Ha Parliament khlem ka kynhun, wat kob kulmar marwei, ong u MP “Ka jingjop ka VPP, ka dei ba ka pynkhih ia ka reservation policy”

Shillong:U MP ka Rajya Sabha na Meghalaya, u Dr. Wanwei Roy Kharlukhi ula ong ba hapoh Parliament kam long kaba jem ban kren bad ban leh eiei, marwei khlem ka kynhun.
Haba kylli halor ka jingjop ka VPP ha kane ka elekshon MP sha ka Lok Sabha, u Dr. Wanwei ula kitbok kumba la jied u paidbah.

U la ong ba ka politik ha Delhi, u la kyrshan tyngeh ia ka jingmut jong u Purno A Sangma ban don kawei ka seng kaba khlain ban don bun ngut ki MP na North East ha Parliament, khnang ban lah ban pynsngew ia ka sur ki paidbah ka thain.
“La kumno kumno 15 -20 ngut ki MP dei ban jop na North East ban ktik ia ka politik ha Delhi hynrei lada ym don bun ngut ki MP ha Parliament, klet shwa ia ka jingphoh sniew eiei”, la ong u Dr. Wanwei.

Ha kajuh ka por, u la ong ba ka jingjop elekshon MP ka Voice of the People Party (VPP), ka dei namar ka jingpynkhih ia ka Reservation Policy, kaba lah ban wanrah ka jingma pat hadien.

U Dr. Wanwei ula kyntait ba ka dei na ka jingkyrshan ka BJP, kaba la pyntroin ia ki kyrtong ka NPP.
Katkum ka jingong u Dr. Wanwei, ka daw ka jingshah rem ki kyrtong ka NPP ka dei namar ba ka Voice of the People Party kala pynkhih ia ka Reservation Policy haduh ba ka la pyllong ia ki paidbah Khasi bad Jaintia ban kyndeh mynsiem, katba ki paidbah na Garo Hills ki la sngew ba ka dei ka jingsyier ia ki bad kane ka la ktah ia ka NPP ha kane ka elekshon MP ha Khasi-Jaintia bad kumjuh sha rilum Garo.
Hynrei ha kajuh ka por, ula ong ba lada ba ka dei shisha ba jop na ka jingkhuid ka politik ne clean politic, un sngew kmen eh haduh katta katta.