Shillong:U President ka Voice of People Party (VPP) u bah Ardent Miller Basaiawmoit uba dei ruh u MLA ka Nongkrem, u la ong ba ka jingbym don ka lynti rel ka dei kawei na ki daw ba ka sorkar ka ju riehtngen na ka jingkiew dor ki marbam mardih.
Haba kren mynta ka sngi ha jaka ba pyllong ia ka jingshong kyrain ha madan Malki halor ka jingkiew dor ki marbam, u bah Ardent M Basaiawmoit u la ong ba ha ka jingshisha ha kiwei ki jylla riewlum kum ha Mizoram, Nagaland ki bym don rel ruh ki dor ki marbam ki kham tad ban hangne ha jylla Meghalaya.
U la ong ba ka jingkiew dor ka doh masi, hato yn kynnoh bym don ka lynti rel ne na ka jingkyrduh masi bad ka jingkyrduh masi ka dei namar ba ka sorkar kam sngap ia ki nongotdoh. U la ong ba ka seng ka la kwah ban iatai hapoh ka iing dorbar thawain ban ioh ia ka jingshai hynrei khlem ailad, khnang ba ka sorkar kan ka jingshai.
U la ong ba kiwei pat ki daw kiba pyllong ia ka jingkiew dor ki marbam, ka dei namar ka jingkharoi ki khyrdop khrong pisa, ka jingkhrong pisa, ka jinglong jem kum ka jaitbynriew kaba shu kut haba shu khnium, ym kum kiwei ki jylla kiba lada kiew dor shipiah ruh ki briew ki mih ban iapyshah.
Ki don ki dor kiba ka sorkar ka la buh hynrei lada thied ia ki ha Iewduh kam iahap satia. U la ong ka dor kaba la buh ka sorkar Meghalaya ka dor u khaw ka long T.45 katba lada thied ka long T.50 ha ka 24 tarik Nailar 2024. Ka umphniang bam T.150 katba ka dor ha Iewduh T.180. Ka dor doh masi ka long T.500 ha Iewduh bad ka khmat lbong lei ka poi T.600 katba ha Mukachung ha Nagaland ka dor doh masi ka long T.300.
U la ong ba kane ka dei tang ka jingsdang ban iakhih bad nangne shakhmat ka seng kan shim da kiwei ki sienjam na bynta ka jingbit jingbiang u paidbah.
Ka jing kiewdor ki mar dei ba ba bun ki khwan myntoi shimet…Bun ki mar ba supply khlem chalan kata ruh ka nang kiew pynban ka jing ia bam sap