Ha Motphran bad Mawlai; ki jingialang bah, ban pyrshah ia ka sorkar NPP

Shillong: U bah Erwin K. Syiem Sutnga u la ai ka jingpynbna lyngba ki lad pathai khubor ba kan don ka jingialang paidbah mynta ka sngi ha ka ophis Maroda kaba hajan madan heh Mawlai Phudmawrie naduh ka por 10 baje mynstep ha kaba yn iakren halor ka mat, ka jingthaw sorkar trai ri bad ka jingshet kylla ki MLA HSPDP. Kumta da kane ka kyrwoh khubor la khot bad wer sngewbha ia baroh ki paradoh parasnam ban ia beh sha kane ka jingialang kaba dei ruh ka kam iap kam im jong ka ri bad ka jaitbynriew.

Ha kawei pat ka khubor, ka Hynniewtrep Youth Council (HYC) ka la phah ia ka kyrwoh khubor jong ka lyngba ki lad pathai khubor, ba kan pynlong ia ka jingialang paidbah mynta ka sngi ha Motphran ban pynrem ia ki arngutki MLA ka HSPSP, kata u Shakliar Warjri bad u Methodious Dkhar na ka daw ka jingbym iasnoh ka jong ki bad ki party Riewlum khlem ka NPP ha ka ban thaw ia ka sorkar kaba thymmai.
Ha kane ka jingialang kan don ruh ka jingthang tyngshop ban dawa ba ki dei ban weng noh ia ka shithi jingkyrshan ka jong ki ia ka seng NPP.

Da kane ka kyrwoh, ka seng HYC ka wer ia baroh ki paidbah kiba don ka jingsngewkhia ia ka iap ka im jong ka ri bad ka jaitbynriew ban sngewbha ban ia wan khnang ha ka por 1 baje nohphai sngi ha Motphran.