Ha Meghalaya, ki don bun spah tylli ki kyntien, ka eh ban hikai beit da ka English, mar iasdang, ong U VC

Shillong:Ka North-Eastern Hill University (NEHU), Shillong, ka dang pynkhreh, ban pynkylla ia baroh ki kot pule jong ki samla pule, ki kot shaphang ka thoh ka tar (litera ture), ki kot pule ba pher sha ki ktien jong kane ka thain, katba kum ka jingbatai jong ka New Education Policy 2020. Ka jing batai jong ka NEP 2020 (NEP 2020), ka kren shai, ba ka jinghikai ha ki skul, ka dei ban long beit ha ka ktien kmie lane ha ka ktien tynrai bad kane ka dei ban long haduh Class 5, lane haduh ka Class 8.

Halor kane ka mat, U Prof Shukla Vice Chancellor jong ka University, ula ong “Ka jingpule ha ka ktien tynrai, ka wan rah ia shibun ki khynnah pule, ka jingthmu jong ka thong jongki ha ka jingpule bad ka jing sngew shlur jongki, ban iakren hapdeng ki para samla pule bad ka jingdon bynta jong ki kmie ki kpa ruh ban iarap ia la ki jong ki khun, namar ba ka kham suk, ba kin hikai, namar ba ka dei da ka ktien tynrai jongki hi”. U Shukla, ula ong shuh shuh, ba ka mat jong ka NEP hi, ka kren shai, ba kam don satia kano kano ka jingpynbor ia kano kano ka kyntien bad katei ka dei ka nuksa kaba bha, ha kaba hikai ia ki kyntien bapher bad kaba kongsan eh, ka long ka jingai jinghikai ia ka ktien kmie, na bynta ki skul Primary bad ki skul higher education, ki dei ban long ha ka ktien kmie, ha kaba la ailad ruh ban pule sa lai jait ki ktien jong ka thain lane ka ktien kmie lane ka ktien shnong (home language).

Halor ka jingbthah jong ka tnat pule puthi ka sorkar India, kumta ka North Eastern Hill University, ka don jingthmu ban kylla ia ki jingthoh kiba bun sha ki ktien jong kane ka thain bad ka don ruh ka jingthmu ban pynkylla ia ki jingthoh jong ki jingtrei bapher jong ki riew khraw jong kane ka jylla, sha ka ktien pule jong ka ri lane sha ki ktien pule jong ka pyrthei, khnang ba ki jingtrei jong ki briew jong kane ka thain, kan saphriang sha kylleng ka pyrthei.
U Vice Chancellor, u ong shuh shuh, ba ha ka jingtrei jongu, kaba shisnem shiteng, ula iakynduh ia ki briew na riwar, kiba thung ia ki jingkieng jri, ia ki pung bad sa ki pung ban ai um ia ki jingthung jingtep, ki nongthain bad sa ki riam ki beit bapher bad nangta sa ki dawai kynbat bad kine ki dei kiba donkam shibun, ban pyni sha kylleng ka pyrthei bad kumta ka jing pynkylla ktien, ka long kaba donkam.

U Vice Chancellor, u ong shuh shuh, ba ha Meghalaya, ki don da ki spah tylli ki kyntien ba ki briew ki kren bad kumta, ka jingsdang ban hikai beit beit sha ka English, mar ia rung ha skul, ka buh jingeh ia kiba bun ki khynnah rit bad kaba pynlong ba kim lah satia ban pule bad u ong shuh shuh, ba ka ktien, kam dei ban long ka jingthut, ia ka jingwad jingtip ne ka jingpule jong u briew bad halor kane u ai nuksa, ba ha kiba bun ki ri ha Latin America lane ha ki ri Europe, ka English kam dei satia, ka ktien, kaba ai jinghikai ha ki skul jong kitei ki Ri.

U Shukla, kumta u khot ia ki nonghikai jong ka University, ba kin shim ia katei ka bynta, ban kylla ia ki kot bapher sha ka Khasi, Garo bad ban pynkylla ruh ia ki jingtrei jong kane ka jylla, sha ka kyntien jong ka Ri lane sha ki kyntien bapher jong ka pyrthei bad u khot ruh ia ki nonghikai ba la shongthait, ki nongthoh bad ki nongtrei ba la shongthait na ka kam, ba kin shim ia kane ka lad bad ba kin iakynduh ia u, ban iakren, halor kane ka jingthmu, kaba ki don.