Shillong, 12 ’lyngkot:
Ka BJYM Meghala-ya ka la ong ba ha Meghalaya ki briew kiba ioh kam sorkar ki dei tang kiba don jingiadei bad kiba iajan bad ki ophisar sorkar bad ki politishian hynrei ki bym kane ka jingiadei, kin nym ioh jaka ban rung kam sorkar watla kin long kiba proh jabieng katno katno ruh.
Haba kren mynta ka sngi hadien ba la rakhe ia ka Sngi ki Samla Ka Ri ne ka National Youth Day, u President ka BJYM u Bah Egenstar Kurkalang u la ong ba namar ka jingthurmur ki tnad thungkam ka sorkar jylla, ka la pynlong ia ki samla ban duh jingkyrmen ia ka jingtreikam ka sorkar.
“Hangne ha jylla, kiba ioh kam sorkar dei tang kito kiba don ka jingiadei bad ki briew ha ka sorkar, kiba haiing hasem, ki briew ki politishian hynrei kiwei ki bym don jingiadei, kin nym ioh kam sorkar satia watla kin nep ka jabieng katno katno ruh”, la ong u Bah Egenstar. U la ong, “ki samla kiba stad kiba proh jabieng ynda la poi ha ka personal interview kin nym pass satia hynrei kin sa pass kito kiba don ka jingiadei bad kiba heh ba hain”.
Ka jingtreikam kaba lymmuh ka sorkar ka la pynlong ia ki samla ban duh jingshaniah bad kumba la paw, bun ki samla ki la iakhih pyrshah ia ka jingthungkam ka District Selection Committee, ka MPSC bad kiwei. Namar ka jingthungkam thurmur ia ki briew ha ki tnad sorkar, kam don shuh ka jingtreikam kaba biang namar ba ha jaka ban shong ki briew kiba dei hok ban shimti ia ka kam, la bsuh da kiwei ki bym ler eiei, la ong u president ka BJYM.
Halor kane, ka BJYM ka la shim ia ka rai ha ka jingialang hynne ka sngi ban dawa na ka sorkar jylla ka dei ban pynsted noh ia ka Youth Policy kaba la thaw naduh u snem 2012 hynrei kaba khlem lerkam haduh kine ki sngi, bad ban thaw ruh ia ka State Youth Commission ban peit ia ka jingeh jong ki samla ha kane ka jylla. U Bah Egenstar u la ong ba ha kane ka jylla 65% ki nongshong Shnong ki dei ki samla bad ka long kaba donkam bha ia ka sorkar ba kan pynsted noh ia kane ka Youth Policy.
Phi don ban ong eiei?