Ha Maikhuli bad Umdoh 18mer, buh mawnongrim ia ki surok ba sdang shna

Nongpoh:U Bah Sosthenes Sohtun, MLA ha ryngkat u Bah Victor Rani, MDC ha ryngkat ki ophisar sorkar lem bad ki riew rangbah, mynhynnin ka sngi ki la leit ban buh Mawnongrim ban shna surok hapoh ka shnong Umdoh 18mer bad kumjuh ha shnong Maikhuli, kaba dei kawei na ki shnong khappud ha Ri Bhoi.
Kitei ki surok kiba la leit ban plie Mawnongrim, ki dei ki surok kiba la sdang ban shna, ha kaba ka surok na Pillangkata sha Maikhuli, ka dei kaba la pynmang haduh T. 5. 26 klur, katba ka surok ha shnong Umdoh 18mer, ka dei kaba la pynmang haduh T. 3.80 klur.

Ka jingleit buh Mawnongrim ha katei ka sngi, la sdang na shnong Umdoh 18mer, hadien kata sa sha shnong Maikhuli, ha kaba lyngba katei ka sngi, la la iohi ba ki paidbah ki la kmen eh, namar ki dei ki shnong kiba la shah iehbein palat ha kiwei ki nongmihkhmat bad ba kim ju pynpoi ia kino kino ki kam pynroi ha kitei ki shnong.

Lyngba jong katei ka sngi, ki riew rangbah lem bad ki riew paidbah na kitei ki shnong, ki la ai jingiaroh ia u Bah Sosthenes Sohtun, ha kaba ki sngew ba dei lyngba ka jingtrei shitom jong u, kaba la pynlong ia kitei ki shnong ba kin ioh ia kitei ki surok bad khamtam eh ba ki dei ki shnong ba kim pat ju iohi surok rong mynno ruh.