Shillong,
12’lyngkot:
Ki jing iakren ha kine ki sngi ki phaloh bha shaphang ka jing long jingman ka saiñpyrthei ha Khasi Hills Autonomous District Council (KHADC) bad katei ka jingiakren ka dei halor ka kam rung Congress u bah PT Sawkmie bad ka jing kynnoh pynkhyllem ia ka shuki u CEM ka KHADC u bah Pynshngaiñ N Syiem bad kumjuh ruh ka la mih ka mat jingiakren kaba la kynnoh ba u CEM u don ka jingthmu ban bate kam EM thymmai noh ia ki MDC kiba wan ban ia soh bad kyrshan ia ka PDF kaba ki lad khubor ki la iathuh ba ha katei ka jingbate kam thymmai kan don ruh ka jingpynhap shuki ia ki 3 ngut ki EM kiba mynta, bad kitei ki kynthup ia u Dy. CEM bah Process T Sawkmie, EM ka tnad khaiï pateng u bah James Sylliang bad ka EM jong ka tnad khlaw ka kong Grace mary Kharpuri.
Halor katei ka khubor u Dy. CEM u la kren sha ki lad khubor mynhynnin ka sngi ha kaba u la ong ba u bah Pynshngaiñ u dei ban sngewnguh ia kitei ki 3 ngut ki MDC naba dei lyngba jong ki la seng ia ka PDF hadien ba ki la mih na ka ARPA ha kaba u la ong ruh ba ha ka jingshisha u dei ma u ban shimti ia ka kam CEM hynrei um sngew iahap ban shimti ia katei ka kam naba u dei u MDC shimet bad kumta u la aiti noh ha u bah Pynshngaiñ kum u CEM uba dei na ka seng Congress. Ka kong Grace Mary kala ong ba kam don eiei ban ong halor katei ka phang.
Katba u bah James Sylliang pat ha ka jingiakren bad ki nongthohkhubor mynta ka sngi u la ong ba haduh mynta um pat ioh jingtip eiei na u CEM ne ioh jingthoh halor katei ka kam bad u la ong ba kumba long mynta u dang shaniah beit ha u CEM bad lada mih kino kino ki jingkylla u la ong ba un sa ia peit. Ha kaba ia dei bad ka hamsaia kaba la saphriang ba u lah ban hap noh na ka shuki ba u shong mynta, utei u MDC ka Mawhati u la ong ba un dang hap ban peit ia ki jingkylla ki ban mih “Nga te ialade nga dei u MDC shimet, nga lait luid ym don nongtied tyrnem ia nga -lada tied da uba 10 kilo ruh ym sam, ka eh ia kiwei kiba dang shah tied tyrnem na khlieh jong ki” ong u bah James haba kylli sha kano ka liang un phai lada mih ka jingiaknieh CEM ha KHADC kumba la her sted ki hamsaia ha kine ki sngi.
U bah James Sylliang u la mynjur ia ka jingkren u bah Process ba u bah Pynshngaiñ u dei ban sngewnguh ia ki 3 ngut kiba la don bynta ban seng ia ka PDF bad kumjuh ruh ban kyntiew ia u sha ka shuki CEM, “Ki jingkren u bah Process ki dei ki jingshisha ,ngim lah ban kyntait ia kata” ong biang u bah James. Halor ki khubor kiba mih ba u CEM u don jingmut ruh ban bate kam thymmai ia ki MDC da ka jingwan ia soh ki MDC na ki Party bapher u bah James u la ong ba ki Party kiba wan ban ia soh bad kyrshan ia ka PDF kim shym la wan ban kyrshan ia kita ki ishu ne ba ki ieit jaitbynriew hynrei ki wan ban peit ia ki jingmyntoi, “Ki don ki party kiba shu wan ha ka kyrteng ieit jaitbynriew ne kyrshan ia ki ishu hynrei ka jingwan jong ki hi ka dei beit ba ki kwah shuki, ngi iohi ba ki don ruh mynta ki Party kiba ia kynad para ma ki hi tang na ka daw ka jingkwah shuki hangne” ong biang u bah James Sylliang.
U MDC ka Mawhati u la ong ruh ba ka jingwan jong kitei ki Party ban kyrshan ia ka PDF ka dei tang ban wanrah ia ka huri hura ha ka sem kaba la skhem jong katei ka kynhun “Ka jingwan kyrshan jong ki ka pynmih pynban ia ka kynrum kynram bad ka mih pynban ka jingorpait hapoh ka PDF” bynrap shuh shuh u bah James Sylliang. Lah ban kdew ba ki Party kiba la wan ia soh thymmai sha ka PDF ki kynthup ia ka UDP, HSPDP, KHNAM bad u MDC shimet u bah Latiplang Kharkongor.
Phi don ban ong eiei?