Nongpoh: Ha kaba sdang ka 1st Open To All Knock Out Football Tournament ha madan Kurkalang Bhoirymbong, ka Lamare Football Club, ka la khur ia ka namjop ba nyngkong, kaba hadien ba ka la lah ban pynliem kput pyrshah ia ka Mawsier Football Club da 7-1.
Ia katei ka lympung ialehkai phutbol kaba heh duh ha Ri Bhoi, la pynlong da Dorbar Shnong Lumdaitkhla ha ryngkat ka jingiatreilang bad kawei ka kynhun kaba la tip kum ‘Ki Mawbyrsiew’ ha kaba ki la pynkhreh ia ka khusnam kaba T. 2.50 lak sha ka kynhun ka ban ioh ban rah ia ka namlahduh bad T. 1.50 lak sha ka kynhun ba wan ha ka kyrdan ba-ar.
Haba phai sha katei ka jingialehkai kaba long hynne ka sngi, la iohi ba ki paidbah na kylleng ki jaka ha Ri Bhoi, ki la leit ban sakhi ia katei ka jingialehkai. Hynrei namar ba la noh shiliang palat ka jingiakhun, ka la pynjlep noh ia ki paidbah kiba la thmu ban leit sakhi ia katei ka jingiakhun.
Ia katei ka lympung ialehkai, la plie paidbah da u Bah RB Shadap, President ka Ri Bhoi District Sports Association, ha ka jingdonlang u Ma Ngaitlang Dhar, MLA barim ka Umroi kum u Kongsan, nangta u Dasakhiatbha Lamare, MLA Mawhati lem bad shibun ki riew rangbah na katei ka thain.
Phi don ban ong eiei?