Ha ki sngi shah jingit ki Muslim kim nguid tang ka um biah ruh

Shillong, 19 Jylliew:
Ha ka sngi thoh dieng jong ka taiew ba la dep une u nongthohkhubor u la ioh ban ia kren bad ki nongialam jong ka Seng bhalang Islam, Shillong halor ka mat kaba ia dei bad ka aiñ shongkha shongman. Hadien ba la pyndep ia ki jingiakren kiba donkam, u bah Akhtar Shabong u Vice President katei ka seng uba dei ruh u trai jong ka ing ba ngi ia kren kam u wanrah shi pela ka sha bad ki jingbam.
U nongthohkhubor u la kylli kumno u wanrah tang shi pela haba ha kata ka ing ngi ia don lai-ngut, u bah Shabong u la ong ba ka dang dei ka sngi shah jingit kam pat long ba kin bam eiei. Hangtei une u nongthoh u la kylli bniah shaphang ka jingshah jingit jong ki Muslim ha kaba u bah Shabong u la jubab ba katei ka sngi shah jingit jong ki la tip kum ka Ramdan bad kan neh baroh shibnai kaba ki kheiñ bnai Lunar ym Solar.
U la ong ba hapoh katei ka shibnai katei ka jingshah jingit jong ki ka sdang naduh ka por 3 baje mynstep bad kan kut haduh da sep ka sngi kata 6:15 janmiet, hapoh katei ka por u la ong ba kim bam kim dih.U bah Akhtar Shabong u la ong ba tang ka um ruh ym long ban dih bad wat ia ka umbiah ruh kim nguid ,ki kbum ha ktien ki sa biah pat shabar haba ka la dap ka shyntur.Katkum katei ka jingiakren kaba la donlang ruh sa uwei pat u heh Muslim u bah Mobarak Lyngdoh, President ka Sengbhalang Islam, Shillong ki la ong ba katei ka jingshah jingit kam ktah eiei ia ka koit ka khiah jong ki naba ka dei ka jingngeit jong ki. Katei ka jingshah jingit jong ki kan kut haduh ka 6 tarik u bnai ban wan.