Ha ki jaka rep ba ai dawai sboh, u ngap um ju don, ong U Bah Banteidor

Shillong:U Myntri ba dei peit ïa ka tnat rep u la pyllait paidbah ïa ka kot ha kaba ïadei bad ka kam ri Ngap ha ka jylla Meghalaya ha ka jingïalang ka tnat rep kaba la tip ka “Apiculture -2”.

Haba kren ha ka jingïalang plie paidbah u Myntri u la ong ba ka kam ri ngap ha ka jylla Meghalaya kam dei kaba thymmai hynrei ka dei kaba la don naduh hyndai, hynrei kaba donkam ka long ban pynheh ïa kane ka kam katkum kane ka juk stad kaba mynta.

U Myntri u la ong ba haba peit bha ha ki jaka rep ba pyndonkam ïa ki dawai sboh u ngap um juh don, hynrei u don ha ki jaka ba ka rep ka dei ka rep tynrai kum sha ri War. U Myntri u la kyntu ruh ïa kiba ri ngap ban pyntip sha ka tnat rep lada ki shem kano kano ka jingeh ym dei ban shu sngap.
La sam ruh ïa ki ksing ri ngap sha ki nongrep ka District kiba hab hapoh jong ki lum Khasi, kaba long kum ka jingbteng ïa ka “Apiculture -1” kaba la sdang ha u snem 2014.

U Myntri u la ban jur ïa ka rukom pynïaid ïew ïa ka ngap kaba mih na kane ka jylla Meghalaya, kaba sngewsih ka long ba ïa ka ngap la thied tad na kane ka jylla bad ynda la song ba la wan die kylla sha kane ka jylla ha ka dor kaba rem.
U Bah Banteidor u la ong ba ïa ka kam ri ngap ha ka jylla Meghalaya la sdang ban pynshlur naduh ki snem 1976 da ka KVIC, hynrei na ka liang jong ka sorkar ka kwah ba kane ka rukom ri ngap kaba mynta kan long katkum kane ka juk stad da kaba pyndon pat ïa ki tiar na kane ka jylla kum ki dieng ban shan ïa ki ksing ri ngap.
Ha ka jingkren u Dr. Vijay Kumar, Commissioner bad Secretary ka tnat rep ka sorkar Meghalaya u la ong ba ha kane ka “Apiculture-2” ka long ba ka jingïarap ïa ki nongri ngap ha kane ka jylla kan long T.70000/- tyngka, na kane T.35000/- tyngka kan dei ka jingïarap bad T.35000/- kan dei ka ram kaba khlem sut.
Katba u Bah S Mawlong Director jong ka MIE u la ong ba na ka liang jong ka sorkar kan pynïoh ïa ki lad jingïarap kumno ban pynbha ïa ka rukom song ïa ki mar rep wat ïa ka ngap. Ha kane ka sngi la donlang ki nongri ngap na kylleng kane ka Ri Khasi ryngkat ki ophisar.