Shillong: Ka kyrteng jong U bah Radha Mawkhlieng, ka dei kaba ki la tip lut naduh ki rangbah, haduh ki samla bad ki khynnah ha ka shnong Umniuh Tmar, kaba don ha ka thain Riwar Pynursla bad ka daw, ka long namar ba U Bah Radha, uba la don kumba 80snem antad, ula dei uwei na ki nong pynkha khyllung uba tbit bad uba la iarap sbun mynsiem ia bun bah ki longkmie kiba kha khyllung ha ka Shnong Umniuh Tmar bad ha kiwei de ki shnong kiba marjan jong katei ka thain.
Ha ka sngi Saitjain ba ladep, ki riew rangbah jong ka Elaka, ki la ia kynduh kyrpang bad U bah Radha, na ka bynta ban ai burom, halor katei ka jingshakri, kaba ula leh ia ki longkmie bad ki longiing, kiba donkam ia ka jing iarap jongu, ha ka por jong ka jingkha khyllung.
Na ka jingthoh, kaba u tah ha khmat jingkhang jongu, ha ka kyntoit Nongrim jong katei ka Elaka, la pyni, ba U Bah Radha, ula sdang ia ka kam pynkha khyllung naduh u snem 1974 bad ula pyni ia ki jingkhein kiba u iarap ban pynkha khyllung ha ka shisnem shisnem bad haba khein na kitei ki jingthoh, kiba ula buh, la lap ba ki khyllung kiba la pynkha na ka kti jongu, ki long baroh 2,732ngut bad katei ka long ha ki 45snem kynthih.
Utei u rangbah, u pyni ba ha u snem 1974, ula pynkha ia 90ngut ki khyllung bad nangta ha u snem 1975, ula pynkha ia 92ngut ki khyllung bad nangta u bteng ter ter khlem pud bad ha u snem 2017, ula pynkha ia 38ngut bad ha u snem 2018, ula pynkha ia 39ngut bad kitei ki dei kiba buh jingkhein, kiba tang ha ka shnong Umniuh Tmar, khlem da ia khein ia kiba shabar shnong.
Ha katei ka jingiakren, utei u rangbah, u iathuh ba u ioh ia katei ka sap, ym dei na kano kano ka jingshah hikai, hynrei, u iathuh ba ka dei ka sap, kaba ula ai U Blei Trai Kynrad ha u bad u iathuh ruh, ba nalor ka Umniuh Tmar, kaba dei ka shnong jongu, u ju leit ban iarap pynkha khun sha Nongjri, Nongshken bad sha kiwei de ki shnong kiba bun bah, ha kaba um ju oh dor satia ia katei ka jingleit ban pynkha khun.
Haba iakren bad utei u rangbah, u iathuh ba nyngkong eh, ula ioh ia ka sap ban long u nong khem met, ha kaba u ju iarap ban sumar ia kiba laitdoh, kiba mynsaw, kiba ur bad kumta ter ter; hynrei hadien ba ula sdang ia ka kam pynkha khyllung, ula sangeh noh, ha kaba sumar ia kiba laitdoh bad ula trei noh shibeit tang ban pynkha khun.
Ula pyni ia ki katto katne ki kot ki sla, kiba la ithuh da ki kynhun shimet, hynrei, kaba sngew bynniaw ka long ba ka tnat ka koit ka khiah, kam shym la ithuh satia ia utei u rangbah bad ym tang katta, ula kren diaw mynsiem, ba ha katei ka rta kaba 80snem eiei, um shym pat ioh wat tang ia ka skhim bam tymmen ruh.
Ha katei ka jingleit ban ai burom, la lam khmat da U bah Teibor Shabong, uba dei U Matabor ka kyntoit Nongrim, ha kaba la don lang ki riew rangbah, ba kynthup ia U bah Elbis Diengdoh bad U bah Monarch Shabong.
Phi don ban ong eiei?