“Ha kamra lajong” ktah kti U CEM JHADC ia u nongthoh khubor

Jowai, 30 Naitung:
U Chief Executive Member (CEM) jong ka Jaintia Hills Autonomous District Council (JHADC) u ma Madonbai Rymbai mynta ka sngi, ula ktah kti khlem poi pyrkhat ia uwei u nongthoh khubor ha kamra treikam jongu. Katei ka jingjia, ka dei ha ka jingleit ia kynduh ki seng bhalang kiba kyn thup ia ka FKJGP, AJY WO,HNYF kiba la khot lang ruh ia ki nongthoh khubor, hynrei u CEM ka JHADC, khlem kano kano ka daw, u la ktah kti khlem ia uwei na ki nongthoh khubor.
Kane ka jingjia ka la jia katba kitei ki sengbhalang bapher bapher jong ka ri lum Jaintia ki la wan kynduh ia u CEM ka JHADC halor ka Sixth Schedule, hynrei hadien ba ki nongthoh khubor ki la dep ban shon bad ring dur, ki la thmu ban mih noh shabar ban ap ia kine ki sengbhalang u CEM u la ieng na ka shuki kaba u shong bad u bat ia u nongthoh khubor bad pynshong jubor ia u hapoh ka jingiakynduh jong u bad kitei ki seng.
Hadien kane ynda la wai ka jingialang une u CEM, u la kren khor biang da kaba ong “Kumno phi ioh bor ban rung shapoh ka kamra treikam ka jong nga khlem da ioh jingbit (Appointment) shwa”. Kumta kitei ki nongthoh khubor kiba don ha katei ka por ki la ai jingtip mar mar sha ki nongialam jong ka Association JJA ban ia kren bad u CEM halor kane ka jingshah bat jong ki hapoh kane ka kamra ophis trei kam jong u, hynrei kham hadien, U CEM, ula pynshai, da kaba ong ba u la bat ia u kum u paralok bad hadien nangta pat la ong ba u bat ia u ban ia dihsha lang hadien ba la wai kane ka jingiakynduh da kaba u la kyllain ruh ia ki rukom jubab bad hadien pat u la panmap (apologise).
Hadien ka jingkren bad ki nongialam ka seng JJA na ka Jaintia Hills bad u CEM, la lap ba kane ka jingleh jong u ka long tang ban pynhiar kput ia ki nongthoh khubor kiba la dep ban pynmih ia kawei ka khubor shaphang ka jingtim sih jong u CEM ha ka jingiakynduh jong kawei pat ka sengbhalang na ri lum Jaiñtia bad u ha kine ki sngi kiba la dep. Ha ka jingiadei bad kane na ka liang ka Jaintia Journalist Association (JJA) ka la pynrem jur ia kum une u CEM ka JHADC u bym burom shuh ia ka shuki ba u bat, na ka liang ka JJA hadien ba kane ka jingjia ki la pynlong mar mar ia ka jingialang bad ki la rai ban iaid beit shakhmat bad ki la pyntip ruh sha u President ka Shillong Press Club ban leh ia kaba don kam.