“Ha ka VPP, la shu ai tiket na jrong, khlem iasyllok ia ki nongkyrshan”

Shillong:Ka seng Voice of the People Party (VPP) ka la paw ba ka don ha ka jingbym iaid beit ha ka rukom ai tiket ia ki kyrtong.
Uwei na kiba pan tiket na bynta ka JHADC, u bah Baitlang Pohsngap ula kam ba ka VPP kala shu ai tiket khlem da bishar bad twad jingmut na ki paidbah kumba la paw ha ka Jowai South konstitwensi.

Haba kren mynta ka sngi, u bah Baitlang ula ong ba ula pan tiket na ka VPP na bynta ban iakhun ia ka MDC elekshon ka ban sa wan, hynrei ka party ka la ai tiket ia uwei pat.
“Nga la wad jingtip, hato ki la leh ka jingwad bniah shwa ban ai tiket, nga la shem ba kam shym la don satia kaba kum kata”, ula ong.
Katkum ba paw, ha ka party VPP, ia ka ticket la shu rai beit najrong, khlem iasyllok bad ki paidbah, ki nongkitkam.
Ha kajuh ka por, ula ong ba ka VPP kam don unit, kam don circle bad kane ka la pynshaiong ia u.
Hadien ba um shym la ioh tiket na ka VPP, u bah Baitlang ula rai ban iakhun noh kum u kyrtong shimet na Jowai South Konstiwensi.

U bah Baitlang udei ruh uba la ju iakhun teng ka ilekshon MDC na ka Congress ha u snem 2019 na katei ka konstitwensi.
Ula ong ba ka jingthmu jong u ban iakhun ia kane ka ilekshon ka long na bynta ban wanrah ka jingkhuid bad ban iada ia ka jylla na ka jingwan rung kyrtlep ki briew nabar. Namar kumba long mynta kane ka jylla ka la long kum ka iing bym don iingkhang jingker shuh ha kaba ki briew ki rung ki mih katba mon.
Ula ong ba un iakhun khlem ka pisa namar lada u iakhun da ka pisa, kan nym don jingkhuid.