Shillong: U Myntri Rang bah, u Conrad K Sangma u la pynpaw ia ka jingkyrmen ba ka sorkar India kan khot noh ia ki nongmihkhmat ka sorkar Meghalaya ban iakren halor ka jingdawa ia ka Inner Line Permit (ILP) kumba la mynjur da ka dorbar Meghalaya Legislative Assembly ha ka 19 tarik, Nohprah 2019.
Haba kren myn hynnin ka sngi, u Conrad u la ong ba lehse ha ka taiew ban wan ka sorkar India kan sa khot ia ka sorkar jylla ban iakren ia kane ka jingdawa ILP.
U Conrad u la iathuh ba u la ioh ban iakren bad Amit Shah halor kane ka bynta, bad u Myntri ka sorkar pdeng u la pyntip ba un sa khot ia ka sorkar Meghalaya ha kine ki sngi ban wan. “La ioh iakren ia u myntri kam pohiing ka ri u Amit Shah uba la ong ban khot ia ka jingiakynduh shen”, la ong u Conrad.
Ha kawei ka liang u Myntri Rangbah u la ong ba ka Meghalaya Residents Safety and Security Ordinance kam long donkam shuh namar ba ka sorkar ka la dep ban mynjur lang ban dawa beit da ka ILP ha ka jylla.
Haba kylli, u Conrad u la ong ba lada pyntreikam ia ka ILP kan nym don jingktah eiei ia ka Sixth Scheduled ha kane ka ka jylla, namar ka iapher kawei na kawei pat. U la ong shuh shuh ba ka sorkar jylla ka kwah shisha ban pyntreikam ia ka ILP bad na ka bynta kane kan pynsngewthuh ruh ia ka sorkar India ia kane ka jingdonkam khnang ban pyllait ia ka Meghalaya na ka jingpyntreikam ia ka Citizenship (Amendment) Act, 2019.
Phi don ban ong eiei?