Ha ka synshar jong ka Congress, shu lyngkrang lut, ong U Bah Bindo

Shillong:U nongialam rangbah jong ka United Democratic Party (UDP) u bah Bindo M Lanong, u la ong ba u paidbah u la dep ban ailad ia ka party Congress, la bun bun snem, hynrei ka jylla hi hapoh ka synshar jong ka party Congress ka lyngkrang lut ha ki bun ki liang bad lada u paidbah u ailad biang ia ka party Congress ha u snem 2023 ka jylla hi kan sa ngam sha ka jingjot.

Haba ia kren bad ki lad pathai khubor na ka liang u bah Lanong u la ong ba ka jingjop bad ka jingrem hi kan shong ha u paidbah u ba lah ban wan rah jingma ne ka jingshngain ia ki seng sain pyrthei ha ka jylla.

“Hynrei kaba nga kwah ban shu ong hangne ka long ba ki paidbah, ki la dep mad ia ka jingsynshar ka party Congress ha kine ki phew phew snem mynta, ha kaba ia ka Ri India hi baroh kawei la ju synshar da ka Congress party shilynter hynrei ki paidbah ki dei ban bishar ba ka Congress ka la leh aiu”la ong u bah Bindo.

U bah Bindo u la ong ruh ba ha ka ba ia dei bad ka jingpynbeit ia u pud u sam mynta la jan sa ka 50 snem ka Congress ka khlem shim khia ha ki snem ba la dep wat la ia ka Ri la shynshar da ka Congress ha Delhi ha Assam bad Meghalaya, hynrei kane ka mat ka sah lyngkrang khlem leh eiei.
U la ong ruh ba ha kaba ia dei bad ka jingdawa ban pyntrei kam ia ka ILP ha ka jylla, na ka liang jong ka Congress ha ba ka dang don ha ka bor hapoh ka jingpyniaid u Dr Mukul Sangma na ka Inner Line Permit ki wan rah pynban ia ka ain ba ki bar jylla kin wan kin shong suk shong shngain bad yn ym don ba lah ban pynwit ia ki.

“Haba ka Ri bad ka jait bynriew ka kren halor ILP ka ban long ka ain ban teh pyrkhing bad ban ym ai lad ba ki bar jylla kin rung ha ka jylla hynrei na ka liang ka Congress ka wanrah da ka Meghalaya Residential Safety and Security Act 2016 (MRSSA) ka ban ai lad ia ki bar jylla ba kin rung ha ryngkat ka shong suk shong sain ha ka jylla” u la ong.

U la ong ba ha ba ia kren bad ka ai kam ai jam na ka liang ka Congress ha kine ki phew phew snem ka khlem lah ban leh eiei kat ka ba ki kular ki khlem pynurlong te lada ki paidbah ki jied ia ka Congress ba kan wan haka bor ki la jied lupa ia ka jingma ia ialade.bad la da u paidbah u la jied ia ka party Congress ka Ri bad ka jait bynriew kan sah ngam sha ka jingjot.
Halor ka jingkob jong ka Party Congress, ba ha u snem 2023 ka Congress kan sa wan ha ka bor, u bah Lanong u la ong ba baroh hi ki seng sainpyrthei, kiba kob suda, hynrei ki paidbah ki dei ban sngewthuh ba ka UDP ka dei ka party ka ba biang lut nadong shadong bad ki paidbah ki dei ban ai lad ia ka, ba kan wan ha ka bor khnang ba u paidbah hi un ym babe.
U bah Lanong u la ong ruh ba ka party Congress hi kam don ia ka jingiatylli ha kaba wat ha ka jingialang jong ki ruh don ka kynhun ka ba leit bad ka don ka bym leit te u paidbah hi un bishar ia kata.