Ha ka sorkar Congress, ka don ka jingbamsap kaba shyrkhei, ong U bah Prestone

Shillong: U bah Prestone Tynsong,Symbud Myntri rangbah ka jylla ha ka sngi nyngkong u la thalain ia ka liang pyrshah ha kaba u la ong ba ka jingshah rem jong ka Congress ha u snem 2018, ka dei ba u paidbah u la sngewthuh ba hapoh ka jingialam ka sorkar Congress ha kato ka por ka bun ka jingbam sap kaba shyrkhei.

Haba ia kren bad ki lad pathai khubor, na ka liang u bah Prestone u la ong ba ka rai jong ki paidbah ha kaba ka la jied ia ka sorkar MDA, ka dei ba ki la sngewthuh ba ka sorkar jong ka Congress kaba la ialam da u Dr Mukul Sangma ka don ka jingbam sap ka ba shyrkhei bad dei na ka ne ka daw ba ka la shah rem ha u snem 2018 bad lada kam dei kum ta ka Congress ka la dei ban bteng ban synshar ia ka jylla haduh mynta.

U la ong ruh “Kum u nongialam ka liang pyrshah u ba la bat ia ka kam kum u Myntri rangbah ka jylla la phra snem, nga sngewthuh bha ia ka jingduh thiah duh dem jong u Dr Mukul Sangma kaba palat”.

“Dei na ka ne ka daw ba teng teng u khroh,teng teng u ong balei ki ia trei lang bad ka BJP, balei ki ia trei bad NPP, balei ki party riewlum ki ba ieid ia ka Ri bad ka jaitbynriew kim mih noh na ka sorkar MDA bad ba kin thaw sorkar bad ka Congress ba ka dei ka party kaba ieid ia ka jaitbynriew” u la ong.

“Hynrei u paidbah u sngewthuh bha ha kaba ym donkam ban ialeh kai politic bad ka party Congress ka dei ban pdiang ia ka rai jong ki paidbah, ba ki la jied ia ka Sorkar MDA ban shynshar na ka bynta san snem bad ngin pyndep ia kane ka samoi trei kam ka ba san snem”. U la ong ruh ia ka party Congress ba kim dei ban kynthoh ia ki seng riewlum ba ki mut ban die ia ka Ri bad ban kam ba ka party Congress ka dei ka party kaba ieid jaitbynriew bad kaba kham bha ban synshar ia ka jylla Meghalaya.