Shillong; Ha ka 25 tarik u Kyllalyngkot 2021, kata kaba long ruh ka sngi rakhe National Voter’s Day yn pynmih ka Election Commission ia ka E-Epic ne ka E-Electors Photo Identity Card, ha kaba pyntip iakane u Bah Federick Roy Kharkongor uba long u Chief Electoral Officer ka jylla, u la ong ba ka Election Commission jong ka Ri India kaba long kaba halor bad kaba don ia kata ka bor ban pynkylla ia ki kyndon katkum ka jingdonkam jong ka juk kaba mynta kan sa pynmih iakata ka E-Epic ha une u bnai uba mynta.
Ka jingpynmih ia kane ka E-Epic ha kane ka sngi ka long ruh ka phang pdeng ban rakhe ia ka National Voters’s Day bad kane ka jingpynmih ia kane ka E-Epic ka long ban pynkupbor, ban peitngor, ban don ka jingshngaiñ bad ban ioh ia ka jingnang jingtip. Kane ka E-Epic ka long kaei kaei kaba kham pher ha kaba uno uno u nongthep vote u la ban download ia kane ha ki mobile phone ki jong ki lyngba ka voter’s app kaba la tip ruh kum ka Virtual Epic.
Shuh shuh U Bah Kharkongor, u la ong ba ka jingpynmih iakane ka E-Epic kan pynsuk shibun ia u paidbah haba u leit thep vote namar bunsien ki paidbah ki shait buh bakla lane pynjah noh ia ka card Epic hynrei ka jingdon ia kane ka E-Epic pat kan pynsuk shibun ia u paidbah tang shisien khynniot ia u budam uba don ha kane ka Voter’s App ki paidbah ki la lah ban ioh ia ka Epic card jong ki. Kane ka E-Epic kaba long kaba shngaiñ bha namar kan don ha ka jingkhang tala jong u digi locker bad ban plie ia une u digi locker hap donkam da u pincode uba tang u trai uba dei trai ia kane ka Epic u lah ban plie ia kane ka E-Epic.
Phi don ban ong eiei?