Ha ka sngi pynthymmai nongkitkam, pynpaw ka MCPC ba u ne ka kyrtong ba ki kyrshan kin poi sha ka thong

Nongpoh: Hynnin ka sngi Saitjain, la don ka jingialang jong ka Mawhati Constituency Political Committee (MCPC), ia kaba ki la pynlong ha Iing Dorbar ka shnong Jatah, la ong ba katei ka jingialang, ka long ban pynkhlain ia ka MCPC bad ka jingiakren na ka bynta ban shim ia ka rai ba iano kin kyrshan ha kane ka Ilekshon 2023 ha Mawhati Constituency.

Ka kyrwoh kaba la phah da u Bah Mathias Mynsong, General Secretary ka MCPC, la pynpaw ba ka MCPC ka dei ka kynhun kaba peit ia ka bha ka miat ha Mawhati Constituency, hynrei haduh mynta ba kam pat don kyrtong, ki la shim ia ka rai ba la kumno kumno hap ban leit ai jingkyrshan ia u ne ka kyrtong kiba aireng na Mawhati, hynrei mynta kim pat pynbna paidbah, namar ki kwah ia ka jingiahun lang jong baroh ki nongialam bad nongkyrshan ka MCPC.

La pynpaw ruh ha ka kyrwoh, ba u ne kano ka kyrtong kaba ioh ia ka jingkyrshan na ka MCPC, u dei ban poi beit sha ka thong jong ka jingjop, na Mawhati Constituency ha kane ka Iekshon jied nongmihkhmat sha ka Iing Dorbar Thawain ka ban long la shem snem. Ka kyrwoh, ka la pynpaw ruh ba ka Komiti jong ka MCPC, ka kyrpad ia baroh ki nongkyrshan kiba don ha ki Primary Unit bapher bapher ha Mawhati Constituency, ba kin dang iaineh ha ka kynhun, namar ynda la dei ka por, ki nongialam ka MCPC, ba kin sa lum ia ki paidbah bad da ka jingiahun lang jong baroh ba kin sa pynbna syndon ia ka kyrteng jong u ne ka kyrtong, ba ka MCPC kan leit ban kyrshan. Ka MCPC, ka kwah ia u nongmihkhmat uba don shisha ia kata ka jingkitkhlieh na bynta ki paidbah ka Konstitwensi bad uba lah shisha ban kyntiew ia ka Konstitwensi ha baroh ki liang, kata naduh ki surok, ki umbam umdih, ka ioh kam ioh jam lem bad kiwei ki jingdonkam ki paidbah.

Hadien katei ka jingpynthymmai, ki nongkitkam ba hakhmat ka MCPC, ki kynthup ia u Bah Anandapbor Mangu, kum u President, u Bah Corensius Manih kum u Vice-President, u Bah Mathias Mynsong, kum u General Secretary lem bad kiwei, nangta la lah ruh ban jied ia ki 9 ngut ba kin long kum ki Adviser, ki kynthup ia u Bah Edmund Marten kum u Chief Advider, nangta ki kynthup ia u B.D laloo, Bah Alos Nongpoh, u Bah Rojen Sten lem bad kiwei.

Ha katei hi ka sngi, la jied ruh ia 28 ngut ki executive members, nangta la pynpaw ruh ba kin sa nang pynrung shuh shuh ha kine ki khyndiat sngi ban wan, la pynpaw ruh ba ka MCPC ka pdiang sngewbha ia ki briew kiba kwah ban pyniasoh sha ka kynhun, pynkut ka kyrwoh.