Ha ka sngi iap u Tirot Sing, mih pyrthei ka WJYC

Jowai, 19 Naitung:
Ka dei ka sngi kaba la jied kyrpang da ki nongialam jong ka seng ban sei madan ia kane ka Seng jong ki Samla ha ka sngi dap 180 snem ka jingkhlad u Tirot Sing syiem. Katto katne ngut ki samla jong ka thain War Jaintia ki ba hap hapoh ka Amlarem Sub-division kila wan ha ka jingsngew thuh jingmut bad rai ban seng noh ia kawei ka seng na ka bynta ban kyntiew iaka roi ka par bad wan rah iaka bha ka miat hapoh jong ka thain. Ka kyrteng jong kane ka Seng ka dei ka War Jaintia Youth Council ia kaba la seng naduh ka 9 tarik Jymmang (May) 2015. Ia kane ka seng la pynpaw pyrthei mynta ka sngi 17 tarik u Naitung (July) da kaba ki dkhot jong kane ka seng ki la pdiang bad pynskhem ia kane ka Riti Treikam (Constitution).
Ka kyrteng jong kane ka Seng ka dei ka War Jaintia Youth Council ia kaba yn tip lyngkot kum ka (WJYC) bad u pud u sam treikam (Area of operation) jong ka War Jaintia Youth Council un long hapoh u pud u ang jong ka Amalrem Sub-Division ne ha ki thain War Jaintia baroh. Ki katto katne tylli ki mat treikam jong ka Seng ki long kumne ki ong ban ialeh ban wan rah iaka roi ka par jong ka thain baroh.Ban kyntiew iaki kam sport bad kumjuh ruh ban pynkiew ia kiwei pat ki kam kiba ia dei bad ka bha ka miat bad ka jingnangroi jong ki samla. Ban ialeh naka bynta ban kyntiew iaka pule ka puthi ha kane ka thain. Ban ialeh ban kyntiew iaka ioh ka kot ha kine ki thain da kaba iarap ban pynroi iaka rep ka riang bad kiwei pat ki lad kamai bad kiwei kiwe pat.
Ka seng kala pynskhem ruh ia ki nongkitkam naka bynta lai snem bad ia ka soskular la ialam da u H.H.Mohrmen. Ki nongkitkam jong ka seng ki kynthup ia u Denial Khongsit kum President, u Jinda Pohleng kum u Vice President, Lasting L. Gadew Genl. Secretary, Ailad Surong Asst. Genl. Secretary, Arki Pamthied Organising Secretary, Benedick Ryngksai Finance Secretary, Kduplang Khyriem Publicity Secretary, Rowell Mylliem Sports Secretary, Helpme Suchiang Education Secretary, Kishore Lamare Convener War Central, Fedrick Kongwang Asst. Education Secretary, Ryngkat Kassar Agriculture Secretary bad Emlad Dhar Office Secretary.