Ha ka sien nyngkong ha ki 60 snem, tap ka ior bah ha Smit

Shillong,
16 Rymphang:
Katba lah ban lum jingtip ka dei ka jingjia kaba nyngkong eh kaba ym pat ju jia ha ki 60 tylli ki snem ba la leit noh , ha kaba ki madan madiah ki lieh shaid na ka jingtap ior kaba shyrkhei ha ka sngi thohdieng jong ka taiew ha Smit, ha kaba la iohi ruh ba ka Madan Ing Sad ka la lieh shaid da ka ior.
Halor katei ka jing jia kaba la jia ha Smit u Rupang u la ioh ban ia kren bad u Sordar jong ka Smit u bah Kynsai Manik Syiem, ha kaba u la iathuh ba katei ka jingjia ka la jia ha ka por 3:30 baje ha ka janmiet sngi thohdieng, bad ka la don ka jinghap ior kaba la neh kumba 45 minit eiei, bad ka jingrben jong ka, ka long 3 inshi haduh shi phut. U bah Kynsai u la iathuh ba kaba kham jur eh ka dei ha Smit, Umphrup bad Thangsning, bad kam shym la don kano kano ka jingjulor namarba ka dei ka por ba ki nongrep kim pat sdang thung sdang tep.
Katkum ka jingiathuh u sordar u la ong ba naduh ba la kha ia u ha Smit la 60 snem mynta um pat ju iohi ba kan don kaba kum kane ka jingjia ban hap ior, watla u la ong ba ka la don teng ka jinghap phria kaba shyrkhei la arsien bad kaba jur eh ka dei ha u snem 1997 ha kaba ka jingrben u phria ka long shi phut shiteng hynrei tang mynmiet pat u la um noh, katba katei ka jinghap ior pat ka shim por ban kylla um.
Ka jinghap jong katei ka ior kala pyn dait thah tasam ha ki thain jong ka Smit, ha kaba la iathuh ba hadien ba la thew la woh la lap ba ka jingkhriat ka poi haduh -2, -3 bad katei ka jingkhriat ka la nang khyrwit tyngeh haduh ka sngi u blei, katba mynta pat ka lah sngi u blei pat ka la kham syiad, hynrei ka ior pat ka pat kylla um.
U sordar ka Smit u la ong ba katei ka jingjia ka pynlyngngoh ia baroh namarba ka de ka bym pat ju jia, ha kaba u la iathuh ba u la ioh ban ia kren ia kane bad ki tymmen kiba 80 snem eiei, bad na ka liang jong ki ruh kim pat ju ioi ia kaba ku kane ka jingjia, “ym tip shuh shaei kan thew” ong u bah Kynsai Manik Syiem namar ba ki tymmen ruh kim nang ong eiei shuh, hynrei u la shu antad ba imat ka dei ka jingkylla ka suin bneng ioh kan kham khriat shuh shuh ha katei ka thain , namar ba kumba ju long manla u snem u la ong ba ha u rymphang ka bneng ka la syaid katba mynta u snem pat ka nang dait thah tasam.