Nongpoh: Ha ka sien kaba nyngkong eh ha Ri Bhoi, ka tnad Fisheries Ri-Bhoi, ka la pyllait paidbah ia ka rukom ban ri Dohkha ha ki Pynthor Kba, kaba long ruh kum ka dak ban pynshlur ia ki Nongrep ba kin Ri Dohkha ha ki Pynthor Kba bad kaba sdang jong katei ka sien kaba nyngkong, la sdang hapoh ka shnong Kdonghulu bad Liarkhla, kiba hap hapoh ka Umroi C&RD Block.
Lyngba jong katei ka rukom ri Dohkha ha ki Pynthor kba, kan da long shisha ka jingmyntoi kaba khraw ia ki Nongrep kba, kata ka long nalor ka jingmyntoi kaba ki ioh na u kba, hynrei kin ioh ruh ia ka jingmyntoi na kitei ki Dohkha kaba la ri lang ha ki pynthor kaba ki rep ki riang.
Kiba la donlang ha kaba pyllait paidbah ia kitei ki Dohkha ha pynthor kba, ki kynthup ia u Bah George B Lyngdoh, MLA ka Umroi, nangta u Bah PS Tariang Superintendent of Fisheries ka Ri Bhoi, u Bah R. Kharbihkhiew, BDO ka Bhoirymbong C&RD Block, Bah D Rymbai Rangbah shnong ka Liarkhla, Bah Arnold Lyngdoh Rangbah Shnong ka Kdonghulu lem bad kiwei de ki riew rangbah jong katei ka thain.
Na ka jingkren jong baroh kiba la ai jingkren ha katei ka sngi, kaba kynthup ia u Bah George B. Lyngdoh, u Bah PS Tariang lem bad kiwei, ki la ong ba katei ka jingri dohkha ha ki Pynthor kba, kan iarap shibun eh ia ki nongrep, namar nalor ka jingmyntoi ba ki ioh ia u kba, hynrei kin ioh ruh ia kitei ki dohkha, pynban kaba kham kongsan eh ka long ba haba ri ia kitei ki dohkha, kan pynsboh wat ia katei ka jaka rep, ia kaba lehse u jingthung un kham bha bunshah.
Ki la ong ruh, ba lada katei ka jingthmu kan urlong kin sa bteng pat sha kiwei kiwei de ki jaka bad kata ka long ban pynshlur ia ki nongrep ba ki dei dei ban ri dohkha ha ki pynthor kba, khnang ba kin ioh ia shibun ki jingmyntoi bad ha kajuh ruh ka por kan sa long ruh ka jingkyrkhu kaba khraw ia ki nongrep.
Kyrmen Ka seisoh namar Kane Ka buit lah leh da bun spah snem mynshwa.kane Ka rukom rep mynta ha Ka ktien nong wei ki khot Aquaponics