Ha ka sien kaba ar, hiar ki hati sha ka shnong Rajai, pynjulor ia kawei ka ïing

Shillong: Hadien shitaiew ba shi kynhun ki hati ki la pynjulor ia ki khat-ar tylli ki ïing ha South West Khasi Hills, mynta ka sngi, sa shi kynhun ki hati ki la pynjulor ia kawei ka ïing ha Rajai kaba hap hapoh ka Ranikor Sub-division jong ka South West Khasi Hills bad kane ka shnong ka iajan bad ka khappud jong ka Bangladesh.

Kine ki shi kynhun ki hati kiba don 12 tylli, ki la hiar sha kane ka shnong ha ka step phyrngab jong ka 20 tarik mynta ka sngi, bad ki la pynher krad ia ki paidbah kiba shong ba sah ha kane ka jaka bad ki la hap ban shongrieh sha khlaw.

Na ka liang ki paidbah jong kane ka shnong, ki la iathuh ba kim tip la kine ki hati ki dei kijuh kiba wan hiar ha ka taiew baladep, bad ki la iathuh ba hadien ka jinghiar kine ki hati ha shnong, na ka liang ka tnad wildlife ki la pynkhreh ia ka camp ban iada ia ki paidbah bad na ka liang ki sengbhalang bapher bapher, ki la kyrpad ia ki nongmihkhmat jong kane ka thaiñ ba kin noh ia ka jingiarap sha kane ka shnong khamtam sha kito ki longïing kiba shah pynpra ka ïing jong ki naba ki la hap ban shu sah ha ka jingdum.