Ha ka sien ba san, bteng u Ferdynald Kharkamni ban long kum u President ka KSU ha Ri Bhoi

Nongpoh: Hynnin ka sngi Saitjain, ba la don ka General Election ne ka jingjied paidbah ban pynthymmai ia ki nongkitkam ka Khasi Student Union (KSU) North Khasi Hills District ha Ri Bhoi, ia kaba ki la pynlong ha Iing Dorbar Hall Sajer Nongpoh, u samla Ferdynald Kharkamni, u la shah jied biang ban long kum u President bad haduh mynta, ka la dei ka sien kaba san ia u ba un long kum u President ka KSU ha Ri Bhoi.

Katei ka General Election ne ban jied pynthymmai biang ia ki nongialam ka seng, ka dei na ka bynta ka samoi 2024-2027, ia kaba la pyniaid da ka Election Committee bad ha katei ka Election, la sakhi da ka jingdon ki nongialam ka KSU Sengkmie, kiba kynthup ia u Raymond Kharjana Organising Secretary bad kiwei ki nongialam ka KSU Sengkmie.

Hadien ba la kut katei ka jingjied ia ki nongialam ka seng, nalor u Fedynald Kharkamni kum u President, ki dkhot ka KSU ki la jied ia u Joseph Lambok Rymbai ba un long kum u Vice-President, u samla James Hitler Mawphniang kum u General Secretary, u Banjop Maring kum u Assistant Secretary, Samla Baiashanlang Kharshanlor Organising Secretary, u Samla Toning Lapang kum u Education Secretary, Richard Roy Lyngdoh Nonglait kum u Information and Publicity Secretary, U Samla Johny Nongrum kum u Sports Secretary lem bad kiwei.