Ha ka sien ba-ar, rat ka eriong; julor ka rynsan ba la pynkhreh ban pdiang ia ka jingiaseng General Assembly ka PCI ha Umroi

Nongpoh: Ka la long shisha ka jingjia kaba la pynsngewsih eh ia ki paid riew ngeit ka Balang Presbyterian hapoh ka shnong Umroi, namar hapdeng ka jingpynkhreh ban pdiang ia ka jingiaseng Beinnel General Assembly ba 44 jong ka Presbyterian Church of India, ka la jied ban pynlong ha katei ka Balang bad kaba dei ban sdang naduh ka 27 haduh 1 Jymmang, hynrei ka rynsan jong katei ka jingpynkhreh ia katei ka jingiaseng ka la shah rat bad pra noh ha ka eriong kaba la wan kynsan hynnin ka miet.

Haba iadei bad katei ka jingshah pynjulor katei ka rynsan kaba la thmu ban pynlong ia katei ka jingiaseng heh jong ki paid riewngeit ka Balang Presbyterian, hynne ka sngi ka la don ka jingialang ba kyrpang jong baroh ki nongialam niam na ki balang bapher bapher, kiba don ha 5 tylli ki shnong ka thain Umroi bad ha katei ka jingialang, ki la shim ia ka rai ba kin iarap ha ka ban leit pynshna ia katei ka rynsan kaba la pynkhreh da ka Balang Presbyterian Umroi.

Ha ka jingialang jong ki paidbah na 5 tylli ki shnong, kiba kynthup ia ka shnong Umroi Umdohbyrthih, Umroi Madan, Umroi Labansaro, Umroi Jaiawpdeng bad ka Umroi Nongrah, kiba dei ki shnong kiba hap hapoh ka jingpeit jong ka Dorbar Umroi Pyllun, ki la pynlong ia ka jingialang kaba kyrpang ha ryngkat ka jingdon u bah George Lyngdoh, ha kaba ki la shim ia ka rai ba kin mih paidbah na ka bynta ban shna pynbha ia katei ka Pandal kaba la sha pynjulor ha ka eriong.
Lah ruh ba kdew hangne, ba katei ka Pandal, ka la shah pynjulor ha ka eriong kaba la syllad tyngeh ia kiba ki jaka ha Ri Bhoi, ha kaba kiba la shah ktah eh ki dei ka thain Umroi bad Umsning, hynrei hadien katei ka jingshah pynjulor la lah ban pynbha pat ia katei ka Rynsan, pynban hynnin ka miet ka eriong ka la wan ban pynjulor biang ia katei ka Rynsan bad kaba la pynjulor eh ia katei ka Rynsan.

Haba iadei bad katei ka jingshah pynjulor ia katei ka rynsan jong katei ka jingiaseng General Assembly, ki nongialam na kitei ki shnong ba marjan, kaba kynthup ha ryngkat ka jingiatreilang bad ki kynhun balang bapher bapher, ki la rai ban iatreilang na ka bynta ban iatreilang katba lah ei ban pynbha ia katei ka rynsan kaba la thmu ban pynlong jingiaseng.