Ha ka shah kem phensydyl, mih bluit ka jingshisha, ba U Sarkar, u kylla sha ka jait Dkhar

Shillong:Ka seng kur Dkhar Jaiñtia Hills Central Body ka la pynshai paidbah, haba iadei bad ka jing shah kem jong uwei u briew, ba latip kum u Ratan Dkhar, uba la shah kem ha ki pulit haba iadei bad ka jingdonkti ka jong u, ban khaïi ia ki dawai jyrhoh phensydyl.

Kumba la mih ha ka khubor ha ka 01&02 tarik, une u briew u la kam ba u dei u Ratan Dkhar, hynrei ka seng kur Dkhar, hadien ka jingbuddien bad tohkit bniah, ki la lap ba u ne u briew um dei satia na ka kur Dkhar, hynrei u dei u bar jylla ha kaba ka jait ka jong u ka dei ka jait Sarkar.

Ka seng kur Dkhar Jaiñtia Hills Central Body, ka pynremjur ia u ne u briew bad la dawa, ba un weng noh shi syndon ia ka jingkam jong u ba u dei na ka jait Dkhar, na ki kot ki sla jong u baroh bad lada um leh kumta ka seng kur Dkhar kan leh da kaba tyngeh da kiwei pat ki sienjam.

Ka seng kur Dkhar, lyngba ki nongialam ba ha khmat jong ka seng kur Dkhar, lyngba U president jong ka, u H.C Dkhar bad u H.H Dkhar ki la maham tyngeh ia kito kiba ai kot ai sla ia u ne u briew ba u dei na ka kur Dkhar, khlem da ioh bor na ka kur bad kumta kito kiba shim ia ka jait jong ka kur ki dei ban weng noh shisyndon khnang ba kin lait na ka jing pynshitom na ka kur bad ki bor jong ka aiñ.

Ka jinglap jong ka kur Dkhar ba u Ratan Sarkar u shim ia ka jait Dkhar, ka dei hadien ba ka seng kur Dkhar Khliehtyrshi Circle ka la tohkit bniah ia u bad lap ba um dei satia na ka jait kur Dkhar.