Shillong: Ka Deputy Commissioner, East Khasi Hills, ka la pynmih kyndon, na ka bynta ban pynlong ia ka Shad Nongkrem, ka ban sdang naduh ka 24tarik Naiwieng 2020.
Ha ka 24tarik, kan don ka lehniam Pomblang Iewduh, ha kaba yn leit na iingsad sha Lum Pomblang bad katei kan long naduh ka por 1 baje nohsngi, haduh 5 baje janmiet. Ha katei ka sngi, yn shah tang 30 ngut ki nongshim bynta bad ki dei ban deng mask lem bad ka jing ia shong jngai iwei ia iwei pat.
Ha ka 25tarik, kan don ka Bujai Blang, ha Lum Pomblang bad kan dei ka prokram kaba naduh 2 baje mynstep haduh 4 baje mynstep bad yn shah tang 82 ngut ki nongshim bynta.
Ha ka 25tarik, kan don ka Shad Nongkjat, ha kaba kan sdang naduh ka por 7baje mynstep, haduh ka por 7.30 mynstep bad la shah tang 26 ngut ki nongshim bynta.
Ha kajuh ka sngi, kan don ka Shad Kynthei bad ka Shad Shynrang, naduh 1 baje haduh 3 baje nohsngi bad yn shah tang 40 ngut ki nongshad bad ki duhalia, ki dei ban shong la ka jong ka jaka, kaba don hajan ka madan shad. Kito kiba wan synran ia ki nongshad, kin shong ha ki rynsan ba la buh bad ki dei ban ia shong jngai iwei ia iwei pat. Yn nym shah ia kiba wan peit kai, ha katei ka jaka shad.
Ha katei hi ka sngi, ha ka jinglehniam naduh ka por 4 baje janmiet, haduh 9 baje mynmiet, kan don ka jinglehniam, ha kaba tang kito kiba shah khot sngewbha, kin leit ban shim bynta.
La bthah ruh ban don ka jing pynbna paidbah, lyngba ka tynghung bad ban nym pynthut ia ka leit ka wan ki kali.
Phi don ban ong eiei?