Ha ka roi ka par ruh sha trai, ha ka pule puthi lei sha trai duh ka Meghalaya

Shillong: Khyndiat sngi mynshwa, la pyni, halor ka jinghiar ki kam pynroi ha ka Jylla Meghalaya, ha kaba ka Niti Ayog, kaba dei ka tnat jong ka sorkar India, ka pyni, ba ka Meghalaya, ka wan ha ka kyrdan jong ki 5 tylli ki jylla ba sniew tam ha ka Ri India, kiba ka jylla, ka ia ryngkat kyrdan bad ka Bihar, Assam nalor kiwei pat, mynta pat ka la mih sa kawei ka jing shisha bad kata ka long ba ka Meghalaya, ka la hiar shi katdei ha ka pule puthi ruh, ha kaba ka ia iaid ryngkat bad ka Assam hi.

Ha ka kaiphod, kaba la pynmih ha ka Sngi U Blei, da ka tnat pule puthi ka sorkar India, la pyni ba ka Assam, Mizoram, Arunachal Pradesh, Nagaland bad ka Meghalaya, ki dei ki jylla, kiba hiar sha trai duh, ha ka pule puthi lane ka Performance Grading Index, na bynta u snem 2019-2020.

Ki kyndon, kiba la jied, ki long ha ki 70 tylli ki parameter bad kitei ki kynthup ia ka access, equity, governance processes, infrastructure and facilities, and learning outcome bad kitei ki dei ki jingtip, kiba la phah hi da ki sorkar jylla sha ka sorkar India bad ba la pynwan ia ki jingkhein jingdiah, da ka National Achievement Survey.

Ka Meghalaya, ka wan sha trai duh, da kaba ka ioh 649 point, ka Tripura, ka wan ha khmat duh, na ki jylla, ka thain shatei lam mihngi, ha kaba ka wan ha ka kyrdan ba 20 jong ki jylla bapher ka India, da kaba ka ioh 801 point.

Ki kyrdan jong ki phra tylli ki jylla shatei lam mihngi, katba kum ka Performance Grading Index, ki long:

20th – Tripura with 801 points.

24th – Sikkim with 772 points.

25th – Manipur with 767 points.

31st – Assam with 738 points.

32nd – Mizoram with 723 points.

34th – Arunachal with 698 points.

35th – Nagaland with 667 points.

36th – Meghalaya with 649 points.

Ka Punjab, ka wan ha khmat duh, da kaba ka ioh 929 point, bud ka Chandigarh da 912 point bad ka Tamil Nadu da 906 point.

Ha kawei pat ka khubor, ka jingkhein jong ka Niti Ayog, ka dei kaba la tip, kum ka Index for Sustainable Development Goals (SDGs), kaba peit bha ia ka rukom trei kam ki jylla bad ki jylla rit, ha ka roi ka par, ha ka ioh ka kot, ka jing sumar mariang bad ki kam imlang sahlang.

Ka Kerala, ka ioh ia ka kyrdan kaba nyngkong eh, da kaba ka ioh 75 marks, nangta ka Himachal Pradesh bad ka Tamil Nadu, ki wan ha kyrdan kaba ar, da kaba ki ioh mar 74 marks.

Ki jylla, kiba sniew tam ka jingtrei kam, kiba hap ha kajuh ka kyrdan, ki long ka Bihar, Jharkhand bad ka Assam bad la pynmih paidbah ia katei ka jingshem jong ka Niti Ayog, da U Rajiv Kumar, Vice Chairman ka Niti Aayog.

Ki jylla kiba wan shakhmat eh, ha ka kyrdan ba san ki kynthup ia ka Kerala, Himachal Pradesh, Tamil Nadu, Andhra Pradesh, Goa, Karnataka, Uttarakhand, Sikkim, Maharashtra.

Ki jylla kiba wan ha ka kyrdan ba san, sha trai duh ha ka jingtrei kam, ki long ka Chattisgarh, Nagaland, Odisha, Arunachal Pradesh, Meghalaya, Rajasthan, Uttar Pradesh, Assam, Jharkhand, Bihar.

Bha tam ka Kerala; ka Meghalaya ka ia ryngkat kyrdan bad ka Bihar, ha ki kam pynroi