HA KA PYRTHEI HYNREI YM JONG KA PYRTHEI

(IOANNIS 17:14)

Da U Scholar Lawriniang
Balang Presbyterian Nongthliew

Jinglamphrang:
Nyngkong eh nga ainguh ia U Blei u ba lah pynkup bor ia nga ban thoh katto katne halor kane ka theme ba ka Jingiaseng Samla KJP Assembly ka la buh kum ka phang pdeng kaba biang por eh jong kane la taiew lehkmen ki Samla ha man la ki Balang kiba hapoh ka KJP Assembly. Bad nga ai khublei kyrpang ruh ia baroh ki paralok ki ba ai la ka por jong ki ban pule ia kane ka khubor, bad nga ngeit skhem kan long ruh ka jingkyrkhu ba khraw baroh kiba pule ia ka. Suk kita kiba minot ha ka jingpule na ba kin ioh tip biang biang ia ka aiom. Shwa ban kham pynleit jingmut halor kane ka theme ba ka Jingiaseng Samla KJP Assembly ka la buh to ngin shu ia phai liak lyngkot eh kum ka jinglamkhmat halor kane ka Gospel.

Haba phai sha kane ka Gospel ka don ia ka jinglong ba khraw bad ba phylla bha na kiwei ki Gospel, kawei na ki jingphylla ka long dei ha kane ka Gospel U Ioannis la thoh ia ka dkhot bad ki kyntien ba khia thew tam ha ka ba ki bangeit shityllup pyrthei ki ju lah lyndet lut ia ka phin shem ia ka Ioannis 3:16. Bad la thoh ia kane ka Gospel da U Ioannis hi (Ioan 21:24) U Khun u Sebedi u ba long wei na ki synran baieit U Jisu Khrist bad ia kaba U Jisu u la khot ruh ia u da u Bonerjes lane u Khun u pyrthat. (Mark 3:17) bad la ong ruh ba u ne u Ioannis u dei ruh u Nongthoh bad U Theologian bad dei u ne Ioannis Synran u ba la thoh ia ka Kitab Jingpynpaw bad ba la pynryngkang par ia u sha dewlynnong Patmos, bad ym tangba u long u nongthoh hynrei u long ruh u nongialap ba khraw ia ka kyrteng U Khrist.?(Jingpynpaw 1:2)
Ha ka pyrthei hynrei ym jong ka pyrthei: Haba bishar ia kine ki kyntien ba don ha kane ka theme ki long ki kyntien kiba bym da shai bha haduh katta katta ia kiba bun ba lang, ki don ki bynta ki ba kham soh kyrdot ia ka pyrkhat bad ka jingmut u briew ban peiphang bad ban shai kdar halor kane ka kyntien khamtam eh ha ki to ki bynta ba ong “Ha ka pyrthei hynrei ym jong” hynrei ban ia pynshai lang katto katne to ngin ia peit shwa kaei ka pyrthei?

Kaei ka Pyrthei? Ka pyrthei ka dei kaba la thaw da U Blei (Jen 1) bad ka don ia ka dur kaba pyllun bad kat kum ka jingwad bniah (research) ki stad wad bniah ki shem ba U Blei u thaw ia ka pyrthei da kaba pynsdien tang ha ka haw haw bad ha kiwei pat ki met bneng (planet) kiba mar jan bad ka. Bad la ong ruh ba ka pyrthei ka iaid tawiar ha la u exist bad ban iaid tawiar ruh ia ka sngi bad dei na ka jingiaid tawiar ka lah ban wanrah ia ka jingdum ka miet bad jingshai ka sngi. Hynrei don pat sa kawei ka jingpyrkhat ha ngi u briew haba ia dei bad ka pyrthei.

Bad kata ka jingpyrkhat ka long Ka pyrthei kaba shapoh jong ka ym kaba shabar lane shalyndet bymlah ban iohi da kiba bun ba lang. Ka pyrthei ka dei kata ka jaka kaba baroh ki jait jingthaw ki ba im ki lah ban don hapoh jong ka, ka dei ruh ka jaka kaba ngi lah ban ia im lang shikynhun bad ban iaid ban ieng ban trei ban ktah ban leh ia baroh ki jait kam hapoh jong ka. Katkum ka ktien U Blei ha ka salm ka ong ba ka dei ruh ka jaka iuhkjat U Blei. Hynrei kat kum pyrkhat Khristan jong ngi pat ka pyrthei ka dei kata ka iingshong basa shipor ba ngi im na ka bynta kiei kiei kum u nongleit jingleit u ba don ha ka lynti ba jngai bha ba u dei ban poi sha kaba u thmu. Bad kynmaw ba U Khrist ruh u la ong shai To leit sha ka pyrthei.

Ha ka pyrthei hynrei ym jong ka pyrthei: Kine ki kyntien ki kdew shai kdar ia ngi ba ngi im ha pyrthei kum ki soh shnong ym kum ki trai shnong, ngi don ha pyrthei tang kum u nongleit kurim ym ka nongleit kurim. Kat kum ka ktien U Blei ha ka Jingrwai Salm 119:19 “Nga long u soh shnong ha ka khydew” bad ha ka shithi u paul sha ki Philipi 3:20 ” “Namar kata ka jinglong trai shnong jong ngi ka long ha bneng” bad phin shem bun ha ka Baibl kiba pynshisha ia ngi ba ngi ngim long na ka jong ka pyrthei hynrei kiba im pat ha pyrthei. (Nuksa-ngi long kum ki nongsah iingwai.) Bad kynmaw ba U Jisu ruh u la ong shai ba ngam long na ka pyrthei.

Ka pyrthei kum ka lynti iaid ba jngai u Nongleit jingleit: Kumba la dep kdew haneng ba ngi im hangne ha pyrthei kam iapher na ka lynti u nongleit jingleit sha ri ba jngai, u nongleit jingleit shwa ba un mih na iing u hap ban da pynkhreh la ki tum ki tam ban song ban rah naduh ka bam ka dih ka peisa tyngka ban mang ha ka lynti ba u dei ban leit, ioh ba lap ka thngan ka sniew ka kali bad kiwei kiwei namar um tip lypa kaei ka ban jia ha shiteng lynti kumta u hap ban da pynkhreh janai bha namar ka jingleit jong u ka long da ki bnai da ki snem. Bad kawei kaba kham ma eh ia u nongleit jingleit ka long ioh ba jia ka aksiden ka kali ba u iaid, lane ioh ba jia ka khih phaloh ka duriaw ha ka lieng ba u shong lane ioh wan ki riewsniew ha shiteng lynti kine ki lah ban dkhat noh ia ka jingim ha shiteng lynti kumta kam long ka lynti kaba suk ba u dei ban iaid u hap ban thom ia ki rai eh rai dam ban poi sha ka jaka ba u thmu ban leit.

Kumta kam iapher ia ngi ki khristan ruh, ngi im hangne ha pyrthei ngi hap ban da pynleit la ka jingmut aiu ngin pynkhreh ia la ka jingim namar kane ka pyrthei kaba ngi im ka long ka lynti iaid u khristan bad kam long ruh ka lynti kaba suk ban iaid, ngin ia kynduh shibun ki jingeh ha pdeng ka jingiaid jong ngi bad ngi hap ban da jied bha ia ka lynti ba ngi dei ban iaid ioh ba ngi jia ka bakla lynti noh (kyrsum ktieh) ia lade da ki jingijli ba bun jait ban pynjakhlia noh ia la ka jingim. Hangta kan jia ka jingmynsaw (Sniew ka jingim) ia ngi bad kawei na ki jingma kaba kum u khristan u ba iaid lynti ha ka pyrthei ka long ba ioh jia ba u riewsniew (Soitan) u wan ban lute shiteng lynti ia ngi lada ngim pynkhreh bha ia ki tiar ialeh, hangta khlem pep ngin sha khnieh lut ia ki jingdon jinem bad wat ban shah dkhat noh ia ka jingim (Jingiadei jong ngi bad U Blei).

Kumta kum u nongleit jingleit ngi hap ban pynkhreh bha ia lade ha shwa ban mih na iing ban poi sha ka ri kaba ngi thmu khnang ban ym bakla lynti ngi don kam ban da iaid bad kiba tip lynti (Bad U Khrist). Namar ha kane jingiaid lynti kum u nongwei kin bun kiba shun ia ngi, namar u Khrist u la ong shai ” Kata ka pyrthei te ka shun ia ki na ba kim long na jong ka pyrthei” (Ioannis 17:14).

Jingpynkut: Kumta kum ki para samla ngi dei ban da pynkhreh janai ha ka lynti ba ngi dei ban iaid ban lait na ka jingsniew ban lait na ki bor jong ka jingkynoi ka pop. Da kaba ngin shaniah skhem ha u Nongialam jong ngi U Khrist khnang ban poi sha ka ri kaba ngi thmu. “Tang ka rukom im jong phi ai kan ia dei dur bad ka gospel U Khrist.” (Phil 1:27)
“To kieng noh ia ka jingkieng atiar U Blei baroh,ba phi lah ban ieng pyrshah ia ki buit thap u soitan” (Eph 6:11)

U Blei un kyrkhu ia phi
Na U Nongthoh