Ha ka por ba nga dang khynnah, ngam ju don juti, ong U bah Prestone

Shillong: U Symbud myntri rangbah ka jylla u bah Prestone Tynsong, u la ong ba ki briew ki lah ban shim ia ka rai halor ka sorkar MDA, da kaba kin pule ia ka kot kaba la pyllait mynta ka sngi “Meghalaya On the Move”ia kane u la kren ha ka sngi ba la dap saw snem ka jingsynshar ka sorkar MDA ia ka jylla.

U bah Tynsong u la ong, ba ha ka 21 tarik haba rakhe ia ka sngi ka jingdap 50 snem jong ka jingioh ia ka jylla ba pura, la don na ki katto katne ngut na ki briew ki la kyntait ban rakhe ia kane ka sngi. U bah Prestone, u la ong haba phai sha u snem 1972 ka jingiapher kaba la don haduh mynta ka long ka bym lah ban ia thuh. “Ha ka por ba nga dang khynnah ngam ju don juti ha kaba nga ioh juti bad sopti tang shisien shisnem, hynrei mynta hadien 50 snem ka la don ka jingkylla kaba bun. “Ha kato ka por u Preston Tynsong u dang long kum u shrieh, bad mynta pat u la long kum u Amitabh Bacchan. Te paralok haba kito ki ba dang don ka jingartatien ki lah ban phai dien ia ka history, ym lah ban buhrieh bad pynisoh bad ngi ha ka jingrakhe kaba ngin sa pynlong ha u Nohprah 2022”u la ong.

Na ka liang u Symbud Myntri rangbah u la ong “Naduh nyngkong ka sngi, ba la thaw ia ka sorkar don ki ba la ong ka kane ka sorkar kam dei ka sorkar Temporally lane Adhoc kan dei ka sorkar ka ban long Contractual bases ne tang lai bnai lane shisnem, hynrei wat ki don ki jingeh hapoh ka jingialam u Myntri rangbah ka jylla u Conrad K Sangma, ka sorkar ka long kumba long mynta”.

“Ha ka general election 2018, ki paidbah ki la pyrta ba ngi kwah ia ka jingkylla kaba dei ban sdang naduh ki nongkyndong bad mynta la bun ki jingkylla wat la kam dei kaba la lah ban pynkylla 100% hynrei ngi la trei shitom ban ialeh ban wan rah ia ka jingkylla ha ka jylla”u la bynrap. “Na ka liang ka sorkar MDA ka long kaba la shim khia ban pynbiang ia ki jingkwah jong u paidbah bad ngi ngeit skhem ba ha ka jingialam jong u myntri rangbah ha ki sngi ban wan kan don shuh shuh ka jing kylla ha ka jylla” la ong u bah Tynsong. U la kyntu ruh ba khnang ba baroh ki skim kiba la pyntrei kam da ka sorkar jylla kan poi sha kiba dei hok, na ka liang ki khun samla ha ki shnong ki thaw ki dei ban shim khia ban leit ban bud dien ia kine na ki Block kiba don ha ki thain jong ki.