HA KA POR ARMET: Kumno ban sumar ialade haba dang armet?

Kong Linda Kongwang

Ka por armet kadei ka por ba lung tam naka bynta ki kynthei baroh. Kadei ka por kaba kmentam naka bynta kito kiba kwah ban don la ka iing ka sem, ki khun ki kti bad ka longiing ba pura. Kadei ka por ha kaba ki longkmie ba armet ki ioh jingieid bad jingkyrkhu bha haka jingim jongki bad ruh ka por hakaba ka jingpynkhreh ban pdiang ia i khunlung ban sa kha sha kane ka pyrthei. Hynrei hato tang ban armet kala biang? Da lei lei ruh em namar ban shu armet khlem da sumar bad phikir bha ialade kalah ban ktah kylla iaka jingkoit jingkhiah jong i khun ba dang pun. Namar kata shim iakine ki jingai jingmut bad bud ryntih iaki haka por armet ban ioh iaka jingkoit jingkhiah ka met ialade bad i khunlung ba dang pun.

KA JINGKILAN MET MAN LA KA SNGI:— Ban sumar bad phikir ialade bad iaka jingkoit jingkhiah haka por armet kan pynlong ia i khun ba dang pun ban koit bad khiah krat bad ban don haka jingkoit jingkhiah kaba pura. Namar kata ban kilan met haka por armet ka long kaba donkam bha. Ka jingkilan met kum kaba iaidkai pyngngad la kumno kumno shiteng kynta mynstep bad shiteng kynta janmiet, ki jingkilan met yoga bad pyniar iala ki kjat man ka kynta kan pynjem koid koid iaki dohksah bad ki mat. Katba ka por kala nang hajan katta phi donkam ban kilan met ban lait naka jingktha syngkai bad ki bynta ba shadien ka met, ka jylleng bad ban bha ka pla khun. Kynmaw ban ym kilan met palat ia kaba dei ban leh namar kalah ban ktah kylla ia ka met ka phad hi baroh kawei bad ruh kynmaw ban ym mareh ne rah kiei kiei kiba khia ban pynduna jingkhia haka por armet kiba lah ban ktah ia i khunlung ba dang pun.

2.BAM IAKI JINGBAM BA TEI MET:— Ha ka por armet bam iaki jingbam kiba ai jingkoit jingkhiah iaphi bad ia i khun ba dang pun jongphi. Kynthup iaki soh,ki jhur,ka dud,ki jhur jyrngam ban ioh iaki Vitamins, ki Calcium, ki Protein, Carbohydrates bad ki minerals haka met jongphi. Ki jingbam kidei ban biang bad bha ban bam namar kiei kiba phi bam ki sam lyngba ne bsa ia i khun ruh hapoh kpoh. Sait khuid iaki kti shuwa bad hadien ba bam ne ktah iaki doh,ki dohkha im ban lait naka jingsma bad ruh kiar nakaba bam iaki kynja khlein, ki jingbam thiang, ka mluh bad ki jingbam kai ba shu sdieh namar kine kilah ban wanrah jingshitom haka met.

3.BUD RYNTIH IAKI JINGAI JINGMUT KI DOKTOR:— Katto katne ki kynthei ki duna ban don iaki Vitamin bad ki Iron haka met haka por armet kaba ialam sha ka jingshah ktah ka jingkoit jingkhiah i khunlung bad ka ialam ruh sha ka jingthut noh ka met hadien habud. Ki doktor jongphi kin iarap ai dawai kiba iadei bad kine ki jingshitom jongphi. Dih bha iaki dawai bad bud ryntih iaki jingai jingmut ki doktor haka liang ka bam ka dih bad ka jingkoit jingkhiah jongka met jongphi. Kynmaw ban kiar naki jingdih kynbat ba shna hi ha iing bad ban phah khem iaka met ha ka por armet namar kane kalah ban ialam sha ka jinghap khun ne shitom ha ka por kha. Kan bha ban bam tang iakito ki jait bam bad ki dawai bala pynthikna da ki doktor. [yn dang bteng]