Ha ka politik ym long thiah, ka shkor ka dei ban sngap beit, ong bah Lahkmen

Shillong: U MLA ka UDP u bah Lahkmen Rymbui u la ong ba ha ka politik, ym dei ban shu thiah beit hynrei ki shkor ki dei ban sngap beit.
U bah Lahkmen ula pynsngew ia kane halor ka jingkylla ka sain pyrthei ha ka jylla, ha kaba ki MLA ka Congress kila leit ban iasoh sha ka NPP.

Haba kren sha ki nongthoh khubor mynta ka sngi halor ka jingleit rung ki 3 ngut ki MLA ka Congress sha ka NPP, u bah Lahkmen u la ong ba kum u MLA ka UDP, um lah ban kren ia ka jingleit iasoh jongki namar ka dei ka kam jongki hynrei kum ka UDP, kan trei shitom na bynta ki paidbah ka jylla.

“Ha ka politik hi, ym dei ban shu thiah, ka shkor ka dei ban sngap beit. Ka UDP ka jingleit iasoh jong ki 3 ngut ki MLA ka Congress sha ka NPP, ngim lah ban ong eiei, namar ba ka dei ka kam shiemt jongki, hynrei kum ka UDP, kaei kaba lah ban leh ka long ban trei shitom na bynta u paidbah bad ka jaitbynriew”, la ong u bah Lahkmen.
Hynnin ka sngi, 3 ngut ki MLA ka Congress kiba kynthup ia u Dr. Celestine Lyngdoh, u bah Charles Marngar, bad u bah Gabriel Wahlang kila leit iasoh noh sha ka NPP.

Halor ka jingkylli, hato ka UDP kan shah weng ne em na ka MDA-2, u bah Lahkmen u la ong ba kata ka shong ha u chairman ka MDA uba dei u myntri rangbah ka jylla u Conrad K Sangma hynrei na ka liang ka UDP kan leh ia ka bynta ha kano kano ka bynta kaba ki bynshet.

“Ki party kiba heh ki don la kajong ka nongrim bad ka UDP kum ka party riewlum, ki briew kila iohi ba la bun tylli ki elekshon, la shu pylleit jingmut tang ha Khasi-Jaintia bad kam don nongrim sha Garo Hills bad kane ka la pyllong ia ki, ba namar ba kam don ka nongrim sha Garo kam lah ban synshar marwei, kane ka dei ka jingiohi shimet jong nga”, la ong u bah Lahkmen.
Ha kajuh ka por, u la ong ba ka jingdon ha ka sorkar kan iarap ban pynsngew ia kino kino ki mat kiba donkam jong u paidbah.