Ha ka miet 24 tarik shah kawang maw ka dur Jisu ha Phudmuri

Shillong, 28 Nohprah:
Ha ka miet 24 tarik katba ki paidbah ki dang ia ap miet sngewkmen ban ap ia ka por ka jingwan long briew u Jisu Krist sha kane ka pyrthei, hynrei katei ka miet ka la kylla long pynban ka miet kaba sngewsih kthang ia ki paid riew ngeit jong ka balang Katholik naba ha katei ka miet ka dur mot jong u Jisu kaba la set hapoh ka iit kaba don ha Kjat shnong, Mawlai Phud muri ka la shah kawang maw ha ki runar kiba la iap ka jingiatiplem, bad katei ka iit ba set ia ka dur mot u Jisu ka la pait. Katei ka jingjia la antad ba ka la jia ha ka por 11:30 ne 11:45 baje ha katei ka miet 24 tarik mynta u bnai.
Tang mar ia ioh ia katei ka jingtip ka Catholic Managing Committee Phudmuri ha katei hi ka miet hapdeng ka jing iadonlang ki Rangbah balang ka la leit shim noh ia utei u dur mot ba la set hapoh iit bad hadien ba la dep ban bujli noh da kawei pat ka iit kaba thymmai la wan ban buh biang ia utei u mot ha katei ka juh ka jaka.
Ha ka step kaba bud kata ha ka 25 tarik ka CMC ka la lum ia ka jingialang kyrkieh jong ka ha ka 25 tarik mynta u bnai bad ha katei ka jingialang ka la pynrem jur ia ki runar kiba la leit ban pynpait dusmon ia katei ka dur Mot u Jisu bad ha kajuh ka por ka la pynlong ia ka jingduwai kyrpang na ka bynta kitei ki runar ba kin kylla kaba mut noh bad ba u mynsiem u blei un ktah hapoh jong ki khamtam ha ka sngi Krismas ba kin kylla kaba mut noh.
Katkum ka kyrwoh khubor ba la phah da u Rangbah Balang, Bah Marcel Lamare bad General Secretary, Bah Daniel R Kurbah ki la pynpaw ba kane ka jingshah thombor ka la pynsngewsih ym tang ia ki riewngeit Katholik, hynrei ia ki nongshong shnong ruh ki bym ju khmih lynti ba kum kine kin jia ha kane ka nongbah.