P.B.S[ba bteng] “Shong pa ngin dihsha shwa” ong u khun bad u phun sha ka dukan kaba u ju dihsha.
Haba la mih na dukan u khun katno u kpa u dap da ka jingkmen bad jingkyrmen ba kata ka dukan watla ka dangrit hynrei ka pyni ia ka dak ka jingkiew. Kata ka jingiohi ka pynpyrkhat ia u kpa ba un thawlad ban ym slem shuh hap wad noh da kawei kaba kham heh ka ban ngiam la kumno kumno arngut ne laingut. U la pyrkhat lypa ruh ba ka por kan sa poi ba dei ban buh noh sa ki mobai ban die ban kham sting ka bai wai.
U khun bynriew uba shong ha une u metbneng rongblu u pyrkhat lut bad kwah lut ia kiei kiei baroh. Teng teng u pyrkhat ban kynjoh wt palat ia u pud.
Ki bnai ki lut ki bnai ki wan. Ka dukan u Halbert ka la nangroi bad ithuh da ki briew. “Nangkiew Enterprise” ka dei ka kyrteng ba u thoh ha dukan da ki dak lieh bad ki dak kiba la thoh itynnad bha. U samla lud kat dang ha ka rta u Halbert katno u dap da ka jingkmen bad sngewtynnad haba ka rung ka mih ha ka pla jong u. Wat tang ha ka shitaiew u la iohi ka T2000 bad T3000 ka wan. Ka jinglong sngewsarong khyndiat khyndiat ka rung ha ka dohnud jong u. Haba ka la dap kam lah khlem da mih shabar.
“Shwa ka Khristmas ngan thied jaket snieh” pynpaw u khun ha khmat ki kmie ki kpa
“Kumno kumta ha jaka ban pynlang shwa lah mih pynban kum kata ka jingthmu” ong ka kmie da ka sur kaba heh
“Peit ho wat ialehkai bad ka pisa. Ka dei ka nongiarap bad ka dei ka nongpynjot” ban ktien biang ka kmie.
“Kan wan biang te mei da la pynlut makna ruh” pynphai ktien u Halbert
“Kan wan kein me tangba da sngap shwa ia ngi ki nongbsa. Wat shu sngew sarong eh” sneng ka kmie
“Haba u kpa jong me u dang pyrkhat ba men kynshew bha bad sa pynlut na ka bynta kaba dei bad kan sa roi arshah” pashat jingmut ka kmie
Ki samla lud ha ka rta kum u Halbert ki dang shah synshar ha ka bud tynneng bad ka pynlut phut. U kpa bad ka kmie kim ju klet bad thait ban sneng bad btin lynti ia la u khun. Ha kawei ka bynta ki kmen ba u la lah ban ieng ha la ka jong ka kjat bad ka sap ba u don. Haba ki peit ia ki khynnah kat ka rta u Halbert kine hai hai ha ka leh pahuh bad shu pan beit na la ki kmie ki kpa. wat kito kiba lah dep ‘degree’ ruh kine ha ka iengkai thadlad ha ki lynti shnong. Ka mobai phun jong ki pat kaba i remdor bad sa ka leh rangbah ha ka dih sikret. Pleng ki dei tang kum ki nongkhrong ha iing
Ka jinglorni bad ka jingkwah tip ia ka jinglong kiwei pat ki longiing ka dang trei jur hangne ha ri Khasi jong ngi. Ka dei ka khubor bangja bad kaba shngiam tam ban tip lorni ia kiwei. Ka lah ban dei ka kam ka jam, ka ioh ka kot, ka rukom shna iing shna sem, ki khun ki kti, khamtam eh ki arngut – shikurim
“Uto u Halbert u la shong dukan phi pa” ong u Hiram ia la u kpa uba dang pule kot khubor
“Kiba duk te me kin lah kyrshan shaei khamtam ba la ia bun” ong u kpa ha ka sur niewbein
“Ka dei pa. Tangba ban ia kaba shu ieng surok, shu pynheh tang ka sur khlem naia lah lah u Halbert” pynphai ktien u khun.
Ha ka kut lad hap pyndem ha ka banse. Ha leh u dang kwah pule men leit tip hi ma me? Me tip ban iohi pisa bad ban kamai dang katto ka rta ka ialam sha kaba sniew. Ka pisa ka pynshoi bad hikai hajar jait. Sa ia peit me” kren pynkut u kpa
“Ngam bakla ban ong haba ban shisha ka duk ym banse ban sangeh noh ka jingpule. Lada ym don mon ruh ka bha ban bylla noh kumto kum u Halbert ban ia kaba shu lehkai bad pynlutkai ia ka spah ka hajar ban pynshitom kai ia ki kmie ki kpa lah lah kaba bylla ban kyrshan ei noh pynban ia ki” kren rangbah u Hiram [yn dang bteng]
Phi don ban ong eiei?