HA KA KUTLAD

P.B.S

[ba bteng] Ar snem duna ka la iaid bad ka Aitilin ka la kit khun. Haba la dei ka por kha ka la kha da i khun kynthei ym da bhabriew eh. Ka jingwan i riewblei kynthei ka la pynkmen ia ka bad kumjuh ruh ia ka kmie jong ka.

Ka jingkit ka la khia hynrei ha ka jingiasngewthuh lang kiei kiei ki iaid beit khlem kano kano ka jingeh. Ine i khun jong u ruh i nang kyrkhu arshah haba ka kali jong u kam ju duh kamai haba u ianujor bad ki por ba mynshuwa. Haba i la dap 4 bnai la pynbaptis ia i ha ka Balang Presbyterian bad la ai kyrteng Naphibanbet.
Haba i Naphibanbet i la dap 1 snem tam ka Aitilin ka la ioh kam ha kawei ka kompani die kali ha ka jingsiew kaba T10,000 shibnai. Ka jingioh kam ba thikna jong ka ka la pynskhem ia ka nongrim jong ka kum ka kynthei ha ryngkat ka kamai u lok.

“Aiti, nga kmen palat ba phi la pynsting ia ka tyrpeng jong nga. Phi, phi kamai bnai, nga pat nga kamai sngi. Hap thawlad noh ka kamai tyngkhat ka ban ioh heh lane kat kaba shah ka kam” u ong katba ki dang ia pynmyllen ia ka khyllung ha jingthiah
“Peit ioh poi sha ka kamai thoh tim ho” pynpaw ka Aitilin kaba thew beit beit shata
“Em, phi kam dei shata ka dei da kawei pat” ong u Hiram bad ka shyit ieid ia ka Naphi na ngab
“Te, phim kren shai te” ka ong
“Ka kam agent die jaka kein” u la iathuh bad ka rkhie
“Kata te ka biang tangba hap sian” ka ong
“Phi l ei uba pnah kumne kum u jalyeit te la khapngiah ka synduk” ong ka Aitilin bad ka rkhie
“Te, kane ka jait kam ka long kumta te lada donbok” pynphai ktien u Hiram
“Wat ju ong donbok seh haba la long Khristan ruh” pynpaw ka Aitilin bad ka pynkyndit ia u Hiram u bym ju iohsngew koit kum kata ka jait jingong
“Phi mut kumno kmie?” u ong bad ka peit shlip ia ka
“Shu ong beit lada u Blei u ibit ne shah ba ngan long briew” ka pynshai
“Kumta pleng!” ong u Hiram
“Kumta kein” ka ong bad ka wiat rymmuin
Kumne ki iaid ki sngi ki por kane ka longiing u Hiram bad ka Aitilin ka tyllun ha ka jingsngewtynnad ha ryngkat bad la ka kiaw kaba la sdang phuh niuhlieh lai powa na ka khlieh jong ka
Haba ka Naphibanbet ka la dap 3 snem ka Aitilin ka la ioh khun biang da i kynthei hi iba bhabriew bha lymphuin lymphoin. La pynbaptis da ka kyrteng Ibahunlin. Kine arngut ki nongpynioh pateng ha la ka kur ka jait ki la nangheh nangsan ha la ka sngi
“Mynta ka sngi nga ioh komishon T50,000 hajar tyngka” ong u Hiram bad sei syndon ban pyni da ka lut T500 ia la ka lok

“Ka la iarap shibun ia ngi. Kyrmen phin sa ioh biang kaba kham heh arshah na kane” pynpaw ka Aiti bad ka niew ia kita ki pisa ba la theh da ka jri robarban
Ha kata ka miet u Hiram ha la marwei shimet u pyrkhat ia la ka mynnor.
“Lada nga iapoi bad ka Rikynti tip ngan long kumno. Bad lada nga pas ia ka kyrdan pule kumba phah i mei i pa tip ngan long kumnno mynta. U briew u lah ban plan ia kaba ban sa wan da la ka jingmut hynrei u Blei pat u pynphai da kumwei pat. Kumba ka paw i kumba ki ieid bha ia ka Aitilin. Nga sngewkmen na ka bynta kane” u kren marwei ha la poh mynsiem; katba ki khun bad ka menkmie ki iohthiah ngai ngai
“Kpa, phin leh kumno ia ka Lamhun ba ka la iaid da kane ka lynti kaba ngam poi pyrkhat. Lada dei u para jaitbynriew Khasi ngam da khuslai than da ka long kumno kumno ruh hynrei mynta ha u dkhar syndon kata ruh u Bihari u bym da biang kyrdan bad ha ka bylla lyngkhot lyngkhai shabar muluk syndon” kren diaw ka kmie u Hiram [yn dang bteng]