HA KA KUTLAD

P.B.S

[ba bteng]“Une u khun jong ngi uba lah heh u lah sngewthuh hi em. Tip ka bha eh pynban yn lah tip shano khamtam kaba la shempap kumta” pashat jingmut u kpa
“Kata ruh ka lam dei hi hynrei ban wan ialam meikha ha ryngkat bad ita i khun iohei te la sngew thamula phi” ong ka menkmie
“Tip shuh seh kmie. Kano kaba kham sngew shongnia la kane ka dei ka jingbuh ryntih u Nongthaw ne kaba rai hi ka mynsiem lajong. Ban shu ong ka dei ka jingbuh u Blei ka dei kaba eh than. To mynta ngin pynhap noh la u sai sawar la ngin pdiang ne kyntait” pan jingmut u menkpa na ka menkmie
“Peit shane khun, kane ka dei ka jingjied jong me hi ban khang ruh ym sngew dei shuh namar ka rta jong me ka lah biang pura. Tang kane kawei ba me dei ban leh kata ka long wan ialam shwa ia ka sha iing ba ngin iohi. Ka durkhmat jong ka briew ka phalang ia kaei kaei kaba shapoh” ong ka kmie
“To mei nga kloi ban leh ia kata” ong u khun da ka khmat kaba ikmen
“Nga ruh ngan ong sa kumno pat ngan hap ban shu mynjur ia ka jingong ka kmie jong me. Ngi ki shynrang Khasi ngi long hi thik kum u mawsawa. Tangba kynmaw wat wan ialam ha u bnai April ho” pynkut u kpa.

“Balei kpa phi ong mawsawa?” bniah ka menkmie
“Haba shu bishar na baroh, nga tharai ngam bakla ha kane ka jylli jaitbynriew jong ngi” u ong
Ka jingshim rai ka kmie bad u kpa ban pyllait ia u ka la pynkmen ia u Hiram. Ha kamra thiah u mutdur tip kumno u kpa bad ka kmie kin bishar ia ka ynda u la wan ialam. U shu ngeit beit ba ki khmat jong ki kin hun namar ka dei ka briew kaba bha bad ka jingioh khun jong ka kumta ka shu long ka jingjia ka bym poi pyrkhat ha ka jingshukor ki rang.

Haba u la khie mynstep ha kata ka step synrai ha kaba ka bneng ka rang bha khriang khriang katno u kmen ha la marwei ban iathuh noh ha la ka paralok ban buh sngi buhia kata ka jingwan pynithuh iing. Tang shu khylliat na iing bad sei ia ka kali na sem u la phun ia ka Aitilin.
“Phi dang leh aiu?” u kylli
“Nga dang saitjain” ka jubab
“Saitjain aiu ko?” u bniah
“Jain khun” ka jubab da kaba rkhie
“ To to” u ong bad u sngew kumno re kumno ia kata ka jubab ba u hap khot khunruid ia kata ka khynnah ka bym pat dap 5 snem
“To to ngan buh shwa jait ba phi dang saitjain” u ong bad u buh noh ia ka phun
“Bah sha Rynjah?” kylli uwei u pasenjar
“Kiew” u jubab
Kumba ka shaka ka tyllun kumta ruh ki jingmut jingpyrkhat u Hiram ka tyllun khamtam haba u kynmaw ia ki kyntien jong ka kmie. Teng teng ka pynwit ia u bad um sngewkhuid shuh ia kata ka jingiadei hynrei ka dur jong ka Aitilin ka pynklet ia u. Teng teng u sngew bym dei ban ialam sha iing bad ban shu aidaw da kumne da kumtai hynrei shiphang pat ka la kylla biang ba u dei ban iaid shaphrang da kaba ngeit ba ka briew kaba la shempap kan kham niewkor ia u lada u lah lei lei ban leh bha.

Ym don uwei ruh u pasenjar u ban iakren bad u namar kim dei kiba ju shong kali bad u. Kane ka la ailad ia u ban iai pyrkhat ia kata ka kam kaba ap ha khmat. Ka kali ka dang poi ha Fire Brigade namar ka don ka blok. U Hiram u la shu kum poi pyrkhat ban pyrkhat ha ka jylli Khristan ba wat kito kiba da iathoh donburom hynrei ki dang iapra ma u lei lei kan eh aiu lada kiei kiei ki bym sngewtynnad kin mih ynda ki la iashong iasah lang.
“Ieng noh hakhmat bah” ong kawei ka longkmie kaba la met iaw
“Sangeh ia nga hangto ha pyrshah ITL mo bah” ong kawei ka thei samla [yn dang bteng]