HA KA KUTLAD

P.B.S

[ba bteng] Ynda lah dep dihsha bad ka ja shi bol ka Sandra ka leit noh bad ka la slem khyndiat na kaba ju leit mynshwa.

Ka poi biang por ha ophis kumba poi lem kiwei kiwei. Ka jingsngewlynga jong ka, kam pat jah khlem pat ioh ka jingtip shaphang u khun lajong. Ynda la dei ka ‘Lunch break’ ha ophis kata ka para nongtrei jong ka ka la iawer dihsha sha kawei ka dukan kaba pajih khyndiat na ophis
“Tharai phi lah kwah tip palat” ong kata ka para nongtrei bad ka dang sei artat la ka tiphin
“Te phi, kum ka kmie nga kyndit artat tip ka kam eh kata namar ym pat ju don ba phun ia nga ha kane ka rukom” ong ka Sandra bad ka ruh ka sei la ka tiphin
“Kong pynai sha dud ar pela” ong ka Sandra
“Kumne kein, kawei ka briew ka iathuh khana ia nga ba ka khun jong ka ka la leit pule shabar jylla. Hangta ka ia pule lang bad uwei u samla khasi. Sngewmat ha ka jingiadei paradoh parasnam ki la poi sha ka jingia itynnad markylliang. Ki lah iajan bha ruh. Ha ka por ba pang ka ju leit pynshngain ia u. Lah kham bunsien ki ju leit shangkai sha ki katto katne ki jaka jngohkai ba itynnad jong kato ka thain ba ki leit pule. Hynrei mynta kata ka khun jong ka ka la shu sah ha ka lyngngoh ba u shu jah khlem wan pule shuh. Ka shu tip ba u la wanphai noh sha la iing. Kane ka la pynkhuslai bha ia ka bad ka ong ba mynta ka shu leh sngewsih bad kren kulmar imat ba ka la ieid ia u” iathuh kata ka para nongtrei.

“Ni tip shuh phi. Tip un dei une u khun jong nga ne da kiwei pat namar ba ma ngi nangne na jylla bun beit kiba leit pule sha ri thor. Ka khlem iathuh kyrteng pat?” buh jingkylli ka kmie u Hiram bad ka bam pynlut ia ka pylleng sdieh.
“Ka kyrteng te, ka lap ia ka kyrteng u khun jong phi, kata, u Hiram” iathuh kata ka paralok nongtrei
“Jngan tiew ka kmie u Hiram kam sngewnang shuh ban ong kumno kumno ruh. Lada bun jingkylli shibun kan shah tharai ba ka iashah khun. Kumta ka la shu ong noh kumne
“Ni jynjar phi haba la ioh khun saitlah runar haba phah ban pule ban kiew shaphrang ha la ka jingim pynban u leh pynban kumta u pynkhuslai pynban ia kata ka samla kat haduh ba kan long kumta. Sa kawei ka daw ka long ba wei haba ym iohi hi da la ka jong ka khmat ka eh than ban batai tip haduh katno kata ka jingiajan hapdeng jong ki” ong ka kmie u Hiram
“Te ia kata pat te phi un ong kumno. Ki khun jong nga la khun jong phi haba ki mon hi ban leh tam ka shu pynjynjar jingmut ia ngi ki nongbsa” ong kata ka para nongtrei
“Ka dei kein” mynjur ka Sandra bad ka ieng ban leit siew ia ka bai sha
“Ianoh ianoh lah dei ka por ban kynrup biang ia ka kam” ong ka paralok nongtrei da kaba peit por na mobai Samsung rong lam stem.

Ki la mih noh nangta na dukan sha ban rung biang sha la kamra kamra trei ha ophis. Ka jingiathuh kata ka para nongtrei ka la pyning khong ia ka kmie u Hiram. La ka treikam makna ruh hynrei ki jingmut jingpyrkhat ki her tang sha kata ka khana ba ka dang shu tip. Kum ka kmie kaba la pun la kha kaba pynheh pynsan ia la u khun katno ka kthang ka mynsiem. Ka la sngewthuh ia ka daw ba balei u Hiram u wanphai noh na ka jingpule khlem da pyntip shwa sha iing. Kam sngew thikna tip u lah iabakla ne tip kumno lah ialong hapdeng jong ki khamtam ka dang dei ka por ba ka bor tan ka dang khlain bha.

Haba la wai trei ka kmie u Hiram bad kata ka paralok nongtrei ki ia iaid ryngkat ryngkat tad haduh ban da poi ha Barik point ban ap taxi. Haba la poi ha iew ka la kdat noh la ka jong ka jong ka lynti. Ka Sandra ka la leit thied dohsniang na kawei ka dukan kaba don ha syndah Toilet ha motphran. Nangne beit beit ka leit sha la iing. Ka la pyrkhat lypa ba ia kata ka jingtip kan shu sngap beit jar tang ha lade. Ka la pyrkhat lypa ba tang shu iathuh ha la u menkpa kan wanrah ka kynrum kynram bad ka jingiapyni bor hapdeng jong ki namar u kpa u Hiram u la dom shisha. [yn dang bteng]