HA KA KUTLAD

P.B.S

[ba bteng] “Ai ba kita ki kyntien jong phi mynta ka miet, mynta ka tarik, mynta ka taiew, mynta u bnai bad mynta u snem un da hap kum ki umjer jingkyrkhu ha kine ki khun bad ki ksiew hadien habud. Katba nga dang ring mynsiem ngan nym klet ia kine ki kyntien jong phi bad ngan kynshew ha la ka dohnud bad ngan peitngor ha ka jingjiar jong ka por” ong ka Larisa bad ka klum bha ia ka nep ba la sdang jot.

“Ka jingbuh bad jingthain ktien jong phi la long kum kito ki tiar pynriam iiing ba die ha khyndailad ba la shna bad pynwandur itynnad bha” iaroh u Bruton ia la ka kurim
“To – to – to ia thiah noh ba la shoh palat ka khmat” ong u Bruton bad sngap noh jar.
Ki kjat sngi ki la shat phyrnai bad baroh ki la iakhie. Ki kynrup la ka kam la kam ban trei. Ka jingshet kaba malu mala bad ba khlem bun jnit bun jnat ka pyndep kam kloi. Ka jingbam mata-madei ka pynlong dawai pynban ban ia kito kiba bam bun jait.
“Mei, nga la leit ho” ong ka Gratia bad ka la kam lai sien kam ban mih na la phyllaw.
“To khun” ong ka kmie bad ka da peit ieid ia la ka khun katba ka nang kam na phalor.
Ka shalyntem jong ka por ka tyllun na uwei u bnai sha uwei pat u bnai. Ym lap ba iohsngew ba ka Gratia ka la ioh syrnod na ka jaka training bad ka dei kaba 3 napdeng kiba tbit tam. Kane ka jinglehbha jong ka khun ka la pynkmen palat ia ki kmie ki kpa kiba duk ba raitoi.

Shwa ba u Halbert un leit sha la ka dukan ka kmie ka la ong, “Halbert wan thied syiar noh me uwei ba ngin ia bam lehkmen shisien shisien ha ka jingim ba ka para jong me ka la ioh syrnod bad ngin ia bam eh daw”.
“To pynhun ia ka jingkwah ka kmie ki khun wat leit klet” ban ktien sa u kpa
“Nga ruh nga sngewkmen ba i ong i mei, kumta ynnai ia pynsngap than ia kata ka jingduk. Nangne shakhmat ngin nym duk shuh hi hynrei ka jingkylla kan wan” ong u Halbert bad ka wiat samrkhie
“Phi lah iohsngew kmie kumno ong u khun” ong u Bruton bad u phai sha la ka menkmie
“Ieh ieh ka Bneng kan iarap ia ngi!” ong ka Larisa bad ka syllud ia la u shniuh ba khleh niuhlieh
“Oh nga buh shaei kumto kato ka Radio” ong u Bruton bad ka dang wad ha kamra.
U bah Bruton u la pyntem ia ka Radio FM bad shong syaid sngi ha baranda ba la sdang orpait. U kup tapmoh rong dpei khleh iong ba ka la dei ka jingmlien jong u. Ha ka bam kwai bad tan duma kruk shi kruk. U pynshat ia la ki khmat shane shatai. Hamar kata ka por ka Larissa ka la wan ban khoh kwai ialade.
“Kpa, balei phim khie noh ia uto u tmain ktien ba la jrong bad la sdang phuh niuhlieh” ong ka menkmie bad ka peit sha u.
“Balei phi i wit seh kumne?” u kylli na ka.

“Ba nga i wit kein ba nga sa ong” ka ong bad ka wiat rymmuin.
“To phah ia u Gavin ba un leit thied bled” u ong bad ka rkhie.
Haba la wan thied bled u khun khlem da pynslem shuh u la khie lut baroh plain naduh ngap haduh mainktien
“Kumto hooid seh. Nga iohi ba ki shynrang kiba khie ia u main ktien ki kham i samla bad i bhabriew bad ki shuh khap pynwandur ia u tmain niuhtmoh. Ym dei pat tang mynta ho phi dei ban leh kumne man ka por tang shu la speh ne sdang heh u tmain” ong ka menkmie bad ka wiat rymmuin.
La iaid ki minit bad ki kynta. U Halbert u la wan iing bad wanrah da u syiar saw ba ibang doh bha uba khia ym duna ia ka 2 kilo tam.

“Me stad palat ban thied da une u syiar. Nga la shu pyrkhat men thied da uba lieh ne ba saw namar la kum klet ban phah lypa shwa ba men leit. Une u syiar saw kein uba ibang doh” kren iaroh u kpa. [yn dang bteng]