HA KA KUTLAD

P.B.S

LYNNONG – 4

[ba bteng] Hadien ba ka Gratia ka la pass klas VIII ka la leit shah hikai ban nang ban suh syntiew. Haba ka la don kumba ar taiew tam ha kane ka jaka shah hikai ka shem jingsngewtynnad shibun eh. Ka mutdur lypa ha la marwei ba tang shu pass kan seng kam noh lane lada ym pat ioh lad kan leit bylla shwa bad ki briew bad ban nang pynlang lypa khyndiat khyndiat na i tulop rit jong ka.

Haba ka Gratia kam leit skul shuh bun ki bym tip ki la kum pyrkhat ba imat ka la ioh briew khamtam ba dei ka khynnah kaba i kyntiak bad shai ktien phlak phlak. Sa kawei ruh bun ki nang khein troin shuh shuh ia kane ka longiing ba kim kotbor ban phah tang ba kan pyndep ia ka kyrdan kaba shiphew (Class X)
“Dang i bynnud ia ka Gratia ba kam leit skul shuh” ong kawei ka para marjan.

“Namar ka jingkutlad ngi hap ban hun” jubab ka kmie ka Gratia
“Em, nga shu ong kein sa tang 2 snem kaba pli” ong biang kata ka paramarjan
“Ka dei kaba phi ong ruh tangba hap shu hun noh kumba nga la ong mynne” ka pynphai ktien biang
“Shuh ngan leit noh ban khreh shet” ong kata ka paramarjan kaba shu ia ieng phylla
Ka Gratia ka la ioh jingiaroh bha hangta ha jaka shah hikai namar ka jinginep bad ka jingdon jingsngewtynnad jong ka ia kata ka kam. Ki nongshah hikai ki don kumba 30 ngut bad 10 ngut na ki kiba i donsap bha kynthup lang ia ka Gratia
“Baroh phi dei ban pynleit jingmut bha namar kane ka dei ka kam kaba hadien ka dei ka tyllong umpohliew na ka bynta ka iing ka sem jong phi bad kumjuh ruh phi lah ban ai kam ia la ki para samla kynthei ynda phi khlain ka tyrpeng” kren ai mynsiem ka nonghikai
“Ym tang katta hynrei ki kurim jong phi ruh kin kmen ba phi la long ki bak ha ki jingdonkam ba bun rukom” bteng biang ka nonghikai bad ka rkhie.
“Phi sngew kumno khun kata ka leit shah hikai embroidery?” kylli u kpa katba ki dang ia bamja lang
“Ka biang phi pa pa. Nga lei nga sngew ba nga lah lah” ong ka Gratia bad ka bam ia u tyrso sdieh
“Sngewtynnad phi khun kumta tangba ioh lehse dang bun sa kiwei pat ki rukom hikai” ong u kpa bad u dait ia u sohmynken jrong
“Tang kut pat kut nang ong lypa hi” ong ka menkmie bad ka dang pynkhad ja ia u menkpa
“Nombar 2 un nang kham biang shuh shuh” kren biria u kpa
“Te ka dei ban long kumta kein” ong ka kmie bad ka wiat rymmuin
“Katne ngi trei shitom ka dei sa ka kamram kine ki khun ban pynsuk ia ngi ki kmie ki kpa ynda ngi la sdang noh tymmen” ong u kpa bad u ieng ban leit thet.

U kti kynta u la poi ha u nombar shiphew bad ka la dei ka por thiah na ka bynta jong ki
Shuwa ban iohthiah ka kmie ka la ong ha la u menkpa kumne “Ynda la ioh bylla ne lah seng kam hi ka Gratia ngi la nang kham sting ka jingkit bad ynda ngi la phuh niuhlieh ngin sa iohi ia ka sngi ba khambha bad ba kmen na ka bynta jong ngi. U Halbert un lah ban bsa khun ynda u la mih iing kumjuh ruh ka Gratia ka lait eh na ka shu ap katba pynjaw u briew. Ka bha hi ba kin ieng la ka jong ka kjat la ka kynthei ne u shynrang
“Ka dei ka dei kmie. Nga ngeit phi ruh phi iohi kumba iohi ma nga ba ka pateng ki kmie ki kpa ki im jynjar bad ka iing kaba shu malu mala ne tang ka sem shiliang hynrei ha ka pateng ki khun la kham biang kham bit. Ha ka pateng lei ki ksiew te la shu i pahuh beit” pynpaw u kpa bad u saham samthiah
“Ai ba kita ki kyntien jong phi mynta ka miet, mynta ka tarik, mynta ka taiew, mynta u bnai bad mynta u snem un da hap kum ki umjer jingkyrkhu ha kine ki khun bad ki ksiew hadien habud. [yn dang bteng]