Ha ka jingtohkit jong ka World Bank, khie spah tam ka Chandigarh bad duk tasam ka Meghalaya

Ha U Nailar 2022, ka World Bank, ka buh jingkhein, ba kiba duk tam ha ka pyrthei, ki dei kiba ioh kamai, da $2.15 lane kaba long 178.57 pisa ha ka shisngi bad kito kiba duna ia katei ka jingioh, ki dei ki briew, kiba da duk ksew shisha bad ha u snem 2019, ka World Bank, ka lap ba ki don 648 million ngut ki briew, ha satlak pyrthei, kiba im ha katei ka jingim kaba duk ksew.

Dangshen, na ka liang jong ka NASA’s Socioeconomic Data and Applications Center (SEDAC), ka la pyntreikam ia ka GRDI, lane ka Global Gridded Relative Deprivation Index; ha kaba ka shim jingkhein, ia ka jingduk ne ka ioh ka kot jong ki briew, ha ka jingjngai kaba kumba 1 kilometre antad bad kito kiba ioh nod, ka pyni, ba ki dei kiba bit ba biang, katba kiba ioh 100, ki dei kiba da duk tasam haduh katta katta bad ia katei ka jingkhein, ym shym la leh tang da ki briew, hynrei, la ring dur ruh, da u satellite, naduh kaba pyni ia ka rukom thang ding, ka jingshai, kaba don ha kito ki shnong, nalor kiwei pat.

Ka jingkhein, ia ka ioh ka kot lane ka GRDI jong ka India, hi baroh kawei, ka long 64.4, nangta ka Chhattisgarh, ka ban leit shen sha ka elekshon jied MLA, ka don ia ka ioh ka kot, kaba long 72.8, ka Madhya Pradesh 74, ka Rajasthan 75.7 bad ka Mizoram 75.1. Ka GRDI, ka pyni, ba kito kiba ka jingkhein, ka palat ia ka 70, ka pyni, ba ki dei kiba sahdien shibun eh, ha ka roi ka par bad ka ioh ka kot jongki.

Ka khubor jong ka India Today, ka pyni, ba ka Meghalaya, ka dei ka jylla, kaba duk tasam ha India, ha kaba ka jingkhein jong ka GRDI, ka pyni, ba ka poi sha ka 79.8, katba ka Chandigarh, ka don tang 19.1 bad katei ka pyni, ba ka jingim jong ki briew ha katei ka jylla, ki dei kiba im ba heh ba hain, kiba biang ka ioh ka kot, ka kamai kajih. Nangta ki briew ha Delhi, Kerala, Tamil Nadu, Puducherry, Punjab and Goa, ki don ia ka jingkhein kaba 60 bad katei ruh ka pyni, ba ki bit ki biang bad ki ioh ia ka jingim kaba pahuh, na kiwei pat.

Katba kum ka jingwad jingtip lane ka Poverty and Shared Prosperity Report (2022), ki don palat 40 percent ki riew shimet, kiba mad ia ka jingim kaba eh bad kaba jwat haduh katta katta, khamtam ha ka kamai kajih bad ka jingdon jingem jongki bad ka dei na katei ka daw, ba ka World Bank, ka la thaw ia katei ka jingtohkit ban lap ia kitei ki briew kiba duk ksew.

Ka GRDI, ka shim jingkhein, ia ka rukom im jong ki khyllung ba dang shu kha, nangta ia kiba la kham san, naduh 15 haduh 64 snem, nangta sa ka jingiap jong ki khyllung, ba la niew na ki 1,000 ngut kiba dang shu kha. Nangta, ka jingiohlad jongki, ha ka pule puthi, ka koit ka khiah bad ka rukom im jongki, nangta ka jingdon ki iing ki sem, ki jingtei kiba kongsan bad kiwei kiwei bad nangta sa ka jingshai lane ka jingmehding jong ka shnong, namar ka pyni, ia ka jinglong jingman ba shisha jong ki briew, ha kitei ki jaka ba ki sah.