New Delhi: U Myntri Rangbah duh ka ri, Narendra Modi, mynta ka sngi u la iashim bynta ha ka jingkilan met Yoga ha Ranchi, kum shi bynta ka jingrakhe ia ka International Day of Yoga.
“To ai ba ka thong kan long ka Yoga na ka bynta ka jingsuk, ka jinglong kawei bad ka jingkiew shaphrang,” la kyntu u Myntri Rangbah duh haba sdang ia ka jingkren jong u, hashuwa ban sdang ia ka jingkilan met.
Haba ai khublei ia baroh ha kane ka jingialang, u la iaroh ia ki nongthoh khubor, bad kito kiba iadon bynta bad ka social media, na ka bynta ka kamram kaba kongsan ba ki la leh ha ka ban pynsapriang ia ka khubor shaphang ka Yoga.
U Myntri Rangbah duh u la ong ba mynta u kwah ban rah ia ka khubor shaphang ka Yoga katkum ka juk mynta, na ki nongbah sha ki shnong bad sha ki iing ki sem jong kiba duk ba suk bad ki jaitbynriew riewlum. U la batai sani ba ka Yoga kadei ban long shi bynta jong ka jingim ha ki briew kiba duk bad ki jaitbynriew riewlum, namar kidei kiba kham mad bha ia ki jingpang jingshitom.
U Myntri Rangbah duh u la ong ba mynta, ryngkat ka jingkylla jong ka por, ka jingphaikhmat jong ngi kadei ban long sha ka bha ka miat ruh, nalor ka jingiada ia ki jingpang. U la ong ba ka Yoga ka lah ban ai ha ngi kane ka bor. U la ong ba kane kadei ka mynsiem jong ka Yoga, bad jong ka jinghikai ba la rim bha ha ka ri.
U Myntri Rangbah duh u la ong ba ka Yoga kam long kaba pura da ki kam ba ngi leh shipor ha madan lane ha ka jingsiang (mat). U la ong ba ka Yoga ka thew sha ka jingmlien ia ka rukom im kaba bha bad ka jingaiti, bad ia kane dei ban mlien ha baroh shi jingim jong ngi.
U Myntri Rangbah duh u la ong ba ka Yoga ka iaid palat ia u pud ki jingkhang ha ka rta, ka jaitbynriew, ka kyrdan, ka rukom pyrkhat, uba riewspah ne uba duk, ka jylla bad ki khappud. U la ong ba ka Yoga kadei ia baroh.
U Myntri Rangbah duh u la ong ba mynta, naduh ki kamra shongkai shaduh sha ki kamra jingialang, ki park sha ki jaka ialehkai, bad ki surok sha ki wellness centre, ka Yoga ka la khring ia ki jingmut jingpyrkhat jong ki briew.
U Narendra Modi u la ong ba ka Yoga kadei kaba la rim bad kaba katkum ka juk mynta. Kalong kaba skhem bad kaba pynbha, u la bynrap.
Mynta da ki spah snem, ka tynrai jong ka Yoga ka dang iai neh kumjuh, ka met ka phad kaba koit ba khiah, ka jingmut jingpyrkhat kaba skhem, ka mynsiem jong ka jinglong kawei, la ong u Myntri rangbah duh. Ka Yoga ka kynthup ia ka jingnang jingtip, ka kam bad ka jingaiti, u la ong.
U Myntri rangbah duh u la ong ba katba ka pyrthei ka jied ia ka Yoga, ngi dei ban ban jur halor ka jingwad bniah ba iadei bad kane ka phang. U la ong ba dei ban pyniasoh ia ka Yoga bad ki bynta kum ha ka medicine, physiotherapy, bad artificial intelligence. [pib]
Phi don ban ong eiei?