Ha ka jingpyrshah ka FKJGP, iaid beit ka iakop khwai ha Lailad

Nongpoh:  Ka jingiakop khwai kaba la pynlong da ka Ri Bhoi Tourism Environment Development Forum (RBTEDF) hynnin ka sngi Saitjain ha wah Umtrew Lailad, ka la iaid beit khlem da don kino kino ki jingshah pynthud, kata wat hadien ba na ka liang ka FKJGP, Sohkhwai Umdu, ka la pyrshah jur halor katei ka jingiakop khwai ha katei ka wah.

  Ha katei ka jingiakop khwai, ki la don ki nongkhwai dohkha (Rawon) na ki jaka bapher bapher, kiba la leit ban iashimbynta sha katei ka jingiakop khwai, kaba ki nongialam ka RBTEDF ki la pynlong ia katei ka jingiakop, kaba long kum shibynta ban pynsngewthuh paidbah halor ka jingkordor ki kynja don kiba im ha katei ka wah bad ruh pynsngewthuh sha ki paidbah ba ki dei ban sumar ba ia ki.

            Haba phai sha ki nongjop, u Bah Puson Maiong, u la ioh ia ka kydan kaba nyngkong hadien ba u la ioh ia ka dohkha kaba khia haduh 4.5 kg, u Bah Pyniohbor Sumer ha ka kyrdan ba-ar bad u Bah S. Maiong, u la wan ha ka kyrdan balai.
            U Bah Plielad Tiewsoh, Chairman ka RBTEDF, u la ong ba ka jingthmu ka Forum ban pynlong ia katei ka jingiakop khwai, ka long ban pynsngewthuh ia ki paidbah ba ki dei ban sumar ia ki dohkha kiba im ha katei ka Wah bad khamtam eh ba ka RBTEDF, ka la don ia ka jingthmu ban pynkylla Fish Sanctuary ia ki katto katne ki bynta jong katei ka wah, kaba dei kawei na ki Wah ba la paw bha ha Ri Bhoi.