Nongpoh: Ki nongialam ka Ri Bhoi Youth Federation (RBYF) Lai Shnong Unit, mynta ka sngi ki la leit ban jurip ia baroh ki bynta jong ka jaka treikam ka ophis u District Transport Officer bad ha katei ka jingleit jurip, ki la lap ba la jan baroh ki bynta jong katei ka ophis DTO, la shu iehshrah bad satah tang da ki jaboh jabain, kata naduh ka jingbym pynkhuid bad ka jingjot jingpei ki jingkhang jong ka jaka leit shabar paidbah kaba don ha katei ka phyllaw ka ophis u DTO Nongpoh.
Haba iadei bad katei ka jingleit jurip ia katei ka ophis u DTO Nongpoh, la ialam da u samla Donbok Lyngdoh kum u president ka Seng Haka jingiadonlang u samla Wickham Marweiñ Secretary, Ritonlang Marweiñ Fainance lem bad kiwei kiwei ki dkhot.
Haba kren sha ki lad pathai khubor u samla Donbok Lyngdoh kum u president ka Seng, u la ong, kane ka jing ibeiñ ïa kane ka building khlem da pynitynnad ïaka rong bad khlem da phikir bha ïaka jaka leit shabar ka la wan rah shibun ki jingeh ïaki paidbah kiba wan donkam ha kane ka ophis bad ka la wan rah ruh ki jingeh ïaki nongshong dukan kiba shong hapoh ka compound jong ka Ophis DTO.
Utei u Nongïalam ka RBYF u la kyntu iaki ophisar ba dei peit ba kin leh eiei ban pynbha mardor ïa kitei ki jingjot jingpei bad ban leh eiei ruh ban wan rah biang ïaka jingitynnad jong katei ka building khnang ba kan nym mih shuh ka jing khñium naki paidbah bad kumjuh naki nongshong dukan kiba la iai shah ïaka jingeh lynta la bun tylli ki snem.
Phi don ban ong eiei?