![](https://www.urupang.com/wp-content/uploads/2023/10/image-77.png)
Ha ka jingleit khynra, kaba triem bha jong ki shipai, Israel Defense Forces (IDF), mynta ka sngi, ki la lah ban pyllait im, ia 250ngut ki riew paidbah, kiba la shah rahbor ha ki ehrang Hamas, hajan ka ktem ka jingker sainar shiah ha Gaza bad ha katei ka jingleit, la pyniap ruh ia 60ngut ki ehrang Hamas. Katei ka dei ka jingkhynra, kaba shyrkhei tam, kaba la leh da ki shipai jong ka Israel.
Ka khubor jong ka IDF, ka iathuh, ba la pyllait im, ia 250ngut kiba shah rahbor, da ka Flotilla 13 unit, haba ki leit ban khynra kynsan kynsan, ia ka ktem jong ki Hamas ha Sufa bad ha katei ka jingleit khynra, la siat iap ia 60ngut ki ehrang Hamas, kiba ker kut, ia kitei kiba shah rahbor. Nalor kitei, la ioh kem im, sa 26ngut ki lehnoh, ba kynthup, ia U Muhammad Abu A’ali, Deputy Commander jong ka Hamas southern Naval Division.
La ring video, kum ka jing pynshisha halor katei ka jingjia, ha kaba la pyni, ba ki shipai Israel, ki leit rung ha katei ka jaka set ia kiba shah rahbor bad don sa kiwei ki shipai, kiba siat pyntieng ia ki ehrang, kiba pahara ia ki shah rahbor bad don sa ki shipai, kiba ther bom, ha ka jaka ba ki ap pahara kitei ki ehrang, katba kiwei ki leit rung sha ka jaka ba la set ia kitei ki shah rahbor bad la kitbak, da ki helicopter, na katei ka jaka bad don ruh kiba la mynsaw, ba la shu rah ha ka stretcher. Haduh mynta, ki don 2,800ngut kiba la iap, na katei ka jingialeh thma. Ka Israel, ka la hukum ia ki 1.1 million ngut ki riew paidbah, kiba shong ba sah ha ki bynta ba shatei jong ka Gaza, ba kin mih shisyndon, na ki iing ki sem jongki bad ba kin leit sah noh sha ki bynta ba shathie jong ka Gaza, hapoh ka 24 kynta.
Phi don ban ong eiei?