Ha ka jingbang u kophi, hap hi u bom na kti u ehrang Hamas; da ka bam bang, pynlapmiet ka nong Israel, ia 5 ki ehrang

U Joe Biden, President ka USA, uba dang kdup bad ai mynsiem, ia ka Rachel Edri, ha Tel Aviv

Tel Aviv:Ka bor jong ka bam bang, ka lah ban pynjem mynsiem, wat ia u snar ehrang, uba bat ia u bom ha ka kti jongu bad ba ula mut ban pynbthei ha ka thei iew ha ka shnong, ba shathie jong ka Israel.

Katei ka dei ka jingjia, ia ka Rachel Edri, kaba la don 65 sem ka rta, kaba la lait na ka jingiap, ha ka 7tarik Risaw 2023, ka sngi jong ka jingleit hiar thma ki ehrang sha ki shnong bapher jong ka Israel bad ka Rachel, ka la shah kerkut ha ki ehrang, haduh 20 kynthih, ha ka iing sah jongka.

Ki lad khubor, ki iathuh ba ka Rachel Edri, ka la pynbieit ia kitei ki ehrang, da kaba ka tyrwa, ia ki, da ki jingbam kiba bang bad khamtam, ba ki la thngan, ha ka jingiaid lynti jongki, shwa ba kin rung ha iing jongka.
La iathuh ba ha ka step jong ka 7tarik Risaw, ka Rachel bad u tnga jongka, U David, ki la shah kerkut ha ki ehrang Hamas bad mar ia rung, kitei ki ehrang, ki iathuh, ba kim don jingthmu ban pynshitom ia ki, tangba ki dei pat ban iap, ha katei hi ka sngi.
Ka Rachel, ka iathuh, ba kitei ki ehrang, kiba don 5ngut, ki i bitar briew bha bad kumta, ka kylli ia ki “La ki la thngan ne em bad mar kumta, ka leit shet, da u kophi uba bang bad ki jingbam ba kin ioh tah sha”. Ynda ki la dep dih sha, ka kylli biang, la ki kwah bam eiei shuh, la iathuh u David, ha ka jingiakren bad ka Channel 12.

Ka Rachel, nangta, ka sop spain ruh, ia ka kti kaba mynsaw jong uwei na kitei ki ehrang bad ka da pyrshang ban kren sngewlem, ba un kham thanda ka jingbitar briew jongu bad nangta, ka iathuh khana ruh bad kitei kiwei pat, ba kin kham jem mynsiem. “Nga pynjem mynsiem ia ki, namar ba nga, ban thied ia ka por, tad haduh, ba ki shipai, kin wan ban pyllait im” ong ka Rachel.

Ynda, haba ka por, ka la biang bad ki shipai, ki la pynkhreh, ban rung ha iing, ka dei ha katei ka por, ba U David, u pyni bor syndon ia kitei ki ehrang, ha kaba u leit ban kynrup ia ka tnga jongu bad iada na ka jingbthei bom bad ka dei ha katei ka por, ba ula lah ban pyllait im, ia ka tnga, kaba ula iashong ia sah lang, la 40 snem kynthih.