“Ha ka jaka ban leit sha ka Council, ka pisa ka leit sha pla jongno re”

Shillong,18 Risaw:
Hadien ba u Chief Executive Member ka KHADC u bah Pynshngaiñ N Syiem u la wanrah ha ing dorbar ia ka ripod jong u Comptroller and Auditor General of India ( CAG) ia ka jingkheiñ jingdiah jong ka KHADC haduh u Lber- 2010, u Chairman ba pyniaid ia ka dorbar u ba Mansturdy Nongrem u la tyrwa sha baroh ki dkhot jong ka KHADC ( MDC) lada don mano mano ba kwah ban ia kren halor katei ka ripod.
Ha katei ka por jan baroh khoit ki MDC kiba don hapoh ing dorbar ki ia sngap, hynrei shuwa ba u Chairman un iaid sha kawei pat ka bynta ia kren, joit la ieng u Deputy CEM ka KHADC u bah Process T Sawkmie uba shong ha syndah u CEM bad u la pan bor na u chairman la u shah ne-m ia u kum u dkhot ka Executive Committee ban kren eiei halor katei ka phang, u Chairman u la ailad ia u.
Haba kren ha ing dorbar u bah Sawkmie u la kren beit beit na ka section 3.4 jong ka CAG ripod kaba u CAG u la lap ba ka Council ka duh kamai bha namarba ka khlem ot ia ka VAT. U bah Sawkmie u la kdew ba mynta ka Council ka don hapdeng ka jingduhnong kaba khraw namarba ka duna jingmih, hynrei hapdeng katei ka jingduhnong u la ong ba haba ka Council ka ioh lum pisa , ha ka jaka ban rung sha ka pla tyngka jong ka-ka rung pynban sha ka pla jongno re jongno, “Ha ka jaka ba ka pisa kan leit sha ka pla jong ka Council, ka leit pynban sha ka pla jongno re jongno” ong u bah Process T Sawkmie haba kren hapoh ing dorbar.
U la kdew ruh ia ki jingjia kynnoh bamsap kiba la jia ha kine ki sngi ha KHADC ha kaba u la ong ba baroh ka pisa ba ka Council ka iohlum nyngkong eh ka dei ban poi sha main branch jong ka hynrei u la ong ba kaba lyngngoh ka long ba ka leit pynban sha ka account jong kiwei pat, “Ka leit pynban sha ka Account jong ki kynhun (Organisation)” u la ong. U la ong ba ka EC ka dei ban peit bha ia kane, “Ka pla tyngka ka la hiar, u CEM u dei ban shimkhia, ia ka pisa tyngka dei ban long kiba husiar bha, ka CBI ka don ha Shillong, husiar ban ym pynjah burom ia ka Council” bynrap biang u bah Process. Haba pynshai ia katei ka jingkren u bah Sawkmie u bah Pynshngaiñ u la ong ba ka 3.4 ka kdew ia ka VAT bad ia ka VAT ki dang pyntreikam tang ha ka sorkar jylla.