Ha ka jaka ban kren ia ki nongrim jong ka party, mih pynban da ki jingkynthoh pyrshah ia kiwei, ki jingkawang ktieh

Albert Maring, Ri bhoi dist

Ka jingmut bad ka jingthmu ha ba pynlong ia ka election Campaign, ka rynsan ialap election ha ki shnong ki thaw, ki dong ki thain bapher bapher, ban pynshai bad pynsngew ia ka mat treikam (Manifesto) jong ka party ia ki nongrim kiba u kyrtong bad ka party ki ieng ban pynsngew sha ki paitbah, katkum ki kyndon jong ka election Commission ba la pynkup bor da ka riti synshar (Constitution) jong ka ri India.

Hynrei kaba sngewsih ka long ba ha ka jaka ban kren ia ki nongrim jong ka party, mih pynban da ki jingkynthoh pyrshah ia kiwei, ki jingkawang ktieh, ki jingkdew kti pyrshah, ki jingiabein party, ia bein briew wat ia ki kam shi-met ruh (personal attack) ki klet noh ban kren ia ki nongrim jong ka party ba ki don.
Kane ka la wanrah ka jingbym sngewtynnad ka la ktah wat ia ka jingsngew jong ki paitbah ba bun ba lang. Kine ki daw bunsien kiba pynlong ban mih ki kynrum kynram, ki huri hura ha ka por election ban poi shaduh u pud ka jingiashoh iadat bad ka jingia mynsaw.

Lyngba kane ka khubor ka jingkyntu ia ki paitbah pari, khamtam ia kito ki nongkyrshan baieid thoin thoin jong ki political party ki bapher bapher kumjuh ki kyrtong kiba ia ai reng ha ka election ban long kiba jai jai, ban nym ialeh shongshit palat, ioh poi sha ki jingjia ba sngewsih, ban kiar na ki jingkynthoh pyrshah ia kiwei bad ki jingiabein party, kumjuh ruh ban iaburom lem ia kiwei.