Ha ka dorbar kyrpang pynbeit ka JHADC ia ka VAB

Jowai, 21 Nohprah:
Mynta ka sngi, ka Jaintia Hills Autonomous District Council ka la pynlong ia ka Dorbar ba kyrpang na ka bynta ban pynbeit biang ia ka bill kaba iadei bad ka jing pynkupbor bad ai iktiar ia ki nongsynshar shnong, naduh ki Rangbah shnong, Dolloi bad Sirdar ia kaba la tip kum ka “The Jaintia Hills Autonomous District (Establishment of Elaka and Village and Election, Appointment, Powers, functions, and jurisdiction of Dolloi, Sirdar, Waheh Shnong) Bill 2015.
Kane kadei ka sien kaba ar ba la pynbeit lane pynkylla ia katei ka bill hapoh ka iing dorbar JHADC hadien ba la wanrah bad ioh ia ka jingmynjur.
Ia kane ka Emergent Special Session la khot da u Chairman jong ka JHADC hadien bad ki MDC khamtam na ka liang kito kiba don ha ka EC jong u ma Thombor Shiwat kum u CEM hadien ba ka sorkar lyngba ka District Councils Affairs ka la pynphai biang sa shisien ia katei ka Bill ha kane ka 16 tarik une u bnai. Ka dorbar kaba la sdang ha ka por 11 baje bad ka la kut noh tang hapoh shiteng kynta da kawei ka jingmut ka la mynjur ia katei ka Bill kaba la pynbeit da ka EC. Haba iakren ba u CEM hadien ba la wan ka jingialang, u la iathuh ba ia kane ka bill la phah biang da ka District Councils Affairs na ka bynta ban pynbeit ia ki katto katne ki jingduna.
“Mynta kasngi ngi la dep leh ia kane ngin sa phah noh hi sha ka sorkar ba kan ioh phah ia ka sha u Lat ka jylla”, la ong u CEM ka JHADC
Ngi kyrmen shkem ba u Lat ka jylla un ai ia ka muhor jong u halor kane ka bill khnang ba kan long ka ain na ka bynta ki nongsynshar shnong.