Shillong: Ia ka Special Review Committee (SRC) la thaw da ka sorkar jylla ban ia bishar halor ka bill kaba la wanrah da ka sorkar pdeng ban pynkylla ia ka khyrnit ba hynriew (Sixth Schedule) ha ka ba la pynlong nyngkong mynta ka sngi hapoh ka jingpyniaid jong u myntri ba dei peit ia ka District Council, u James K Sangma.
Haba kren ha ki lad pathai khubor na ka liang jong u myntri, u la ong ba na ka liang jong ka SRC kan dang ia kynduh biang ha ka 26 tarik mynta u bnai ha kane ka taiew ban wan ban dang iai bteng shuh ia kane ka jingkren halor kane ka juh ka phang.
U Myntri u la iathuh ba ki la ia kren ha kane ka jingiakynduh mynta ka sngi halor ka bynta kaba la don ha ka Bill kaba la wanrah da ka sorkar pdeng ban thung MDC ia ki jaid bynriew riewlum kiba khlem don nongmihkhmat ha ka ktien nongwei ki ong “Unrepresented Tribes” ia kane ki dang iai bteng biang ban ia kren ha ka jingkynduh ha kane ka taiew ban wan.
Halor ka jingpynbna jong u President 1950, na ka liang jong u myntri u la ong ba kane ka dei da kawei pat ka phang ka bym don jingiadei ei ei ruh em bad kaei kaba kane ka jingthmu ban pynkylla ia ka Sixth Schedule.
U bah Samuel B Jyrwa, ba mih khmat na ka liang jong ki riew paidbah sha kane ka SRC, u la ong ba kin dang ia kynduh biang ha ka sngi Palei ban wan kata ka 26 tarik mynta u bnai. Na ka liang jong ki, ki la pynpaw ia ka jingsngew ha kaba ia dei bad ka jingong ban thung MDC ia ki jaidbynriew kiba khlem don nongmih khmat.
Kawei pat ka long halor ka Village Council, Municipal Council, na ka liang jong u Bah Samuel u ka ong ba wat la ha ka Bill kala don ba kitei kin nym trei kam ha ka jylla Meghalaya, hynrei ka don pat ka ktien kaba ong kane kan long tad haduh ban da pynbna pat da u Lat jong ka jylla.
Haba ia dei bad ka jingjied ia ki rangbah shnong, na ka liang jong ki, ki la pynpaw ba kane kam dei ban hap hapoh jong ka State Election Commission, hynrei dei ban leh lyngba jong ki District, u la ong ba kin sa dang ia kren biang ia kane ka kam ha ka 26 tarik mynta u bnai.
Phi don ban ong eiei?