Shillong: Ka jingbym kheiñ snep jong ka Sorkar Jylla ka la pynlong ia ki nonghikai skul SSA kiba don hapoh ka shatri jong ka Meghalaya SSA School Association ba kin iaid shakhmat ban bteng ia ki jingiakhih jong ki kaba arsngi lynter kata ha ka 11 bad 12 tarik u bnai Risaw 2021. Kane ka jingiaid shakhmat jong ki nonghikai SSA ban bteng ia ka jingiakhih jong ki ka long hadien ka jingai por jong ka seng ia ka Sorkar Jylla ka la kut noh ha ka 30 tarik u bnai Nailur 2021 ban pynurlong ia ki jingdawa ba kane ka seng ka la phah sha ka Sorkar jylla.
Lyngba ka kyrwoh ba la phah sha ki lad pathai khubor na u nongialam jong ka MSSASA u ba dei ruh u Vice President, u Bah Jylliewjingmut Lyngkhoi, u la ong ba watla ka seng ka la ai por ia ka Sorkar ba kan ai jubab hynrei ka la shu sngap mynthi khlem kano kano ka jingai jubab kumta na ka liang ka seng ka la rai ba ha ka 11 bad ka 12 tarik u bnai Risaw 2021 ka seng kan pynlong da ka jingiakhih kaba ar sngi kata ka mass casual leave ka ban long ha Madan Malki Shillong bad u la kyntu ruh ia ki para nonghikai SSA kiba don hapoh ka jylla ba kin iasnoh kti lang ha katei ka sngi kum ka jingpyrshah ia ka jingleh mynthi jong ka sorkar jylla khnang ba ka jingdawa kan long kaba jop bad kaba seisoh bad na ka liang ka seng ka la ong ba katba ka Sorkar kam lah ban pynurlong ia ki jingdawa jong ki, ka seng kan nym shongthait satia.
Ki mat jingdawa ba ka MSSASA ka la dawa na ka Sorkar ki long ha kaba iadei bad ka rukom pynbeit ia ka jingsiew tulop sha ki nonghikai, ka jingpynkiew ia ka tulop jong ki 12,541 ngut ki nonghikai skul SSA kiba don ha ka jylla Meghalaya, ka jingdawa ban pynkynriah noh ia ki 12,541 ngut ki nonghikai na ka State Implementation Society sha ka tnad pule puthi jong ka sorkar jylla kum ki nonghikai bapura katkum ki kyndon jong ka RTE Act, 2019 bad ka SSA RTE Norms bad ban pyllait noh ia ka tulop kaba dang sah jong ki sawbnai kata naduh u bnai Jylliew, u bnai Naitung, u bnai Nailar bad u bnai Nailur kaba dang sahteng haduh mynta.
La Ngiah ssa shi ssa