Ha jaka ka ILP, yn pyntreikam da kiwei ki lad:Mukul

Shillong, 29 Nailar:
U Myntri Rangbah ka jylla u Mukul Sangma u la ong ba ka sorkar ka kut jingmut ban pyntrei kam da kiwei ki lad ban khang lad ia ka jingwan rung ki mynder sha ka ne ka jylla.
Haba kren mynta ka sngi, hadien ba la ia kynduh bad ki seng bha lang, u Mukul u la ong ba ka sor kar ha kine ki lai snem, ka la shim ia kiba bun ki lad ki lynti ban pynkhlain ia ki bor ka ain ban teh lakam ia ka jing wan rung ki briew sha kane ka jylla.
“117 tylli ki kam la mang na ka bynta ban pynkhlain ia ka tnad Directorate ka Infiltration bad ngin mang shuh shuh”, la ong u Mukul.
U la ong ba ka sorkar ka la thaw ia ka Task Force ban khlieh da u Deputy Commissioner ha kaba ki tnad bapher bapher ki donkam ban trei ban peitngor ia ka jingwan rung ki briew nabar sha kane ka jylla.
U Myntri Rangbah u la ong ba ka donkam ruh ban pyntreikam ia ka National Population Register (NPR) ha ka jylla khnang ban pynshisha ia ki briew kiba long artatien ne kiba thmu ban thaw tuh ia ki kot ki sla.
U la ong ba ka sorkar lyngba ki ain, ka kwah ruh ban pynngat ia ki nongaikam ha ki par dewiong hapoh ka ain namar ba don ka jingiadei hapdeng ki nongai kam bad kito ki briew kiba shu wan rung beain sha kane ka jylla. Ia kane la lap lyngba ka jingshem jong ki BSF kiba ju ioh bat ia ki briew ba wan rung beain sha India man ka por lyngba u pud u sam ba don ha kane ka jylla bad ka Bangladesh.